Վրաստանում ՀՀ դեսպան Յուրի Վարդանյանն այդպես էլ Ախալցխա չի մեկնել՝ պարզելու ապրիլի 23-ին հայ եւ վրացի երիտասարդների մասնակցությամբ տեղի ունեցած միջադեպի մանրամասները: Այս մասին NEWS.am-ի հետ զրույցում վստահեցրեց «Վիրք» չգրանցված կուսակցության համանախագահ Դավիթ Ռստակյանը:
«Եթե Յուրի Վարդանյանն Ախալցխա գար, մենք անպայման կիմանայինք այդ մասին: Այս պահին ամեն ինչ անում են, որ ծածկադմփոց սարքեն: Փորձում են համոզել, որ հայկական կողմն իր բողոքը հետ վերցնի, թե իբր քրիստոնյա ազգեր ենք, եւ այլն, եւ այլն»,- ասաց Դավիթ Ռստակյանը:
Նշենք, որ դեռ շաբաթներ առաջ Վրաստանում ՀՀ դեսպանատանից NEWS.am-ին հայտնել էին, որ մի քանի օրվա մեջ Յուրի Վարդանյանը մեկնելու է Ախալցխա:
Հիշեցնենք, որ «Ջավախք» հայրենակցական միությունն օրեր առաջ հայտարարություն էր տարածել Ախալցխայում կատարված միջադեպի կապակցությամբ: Ըստ հայտարարության՝ ապրիլի 23-ին ավանդական ջահերով երթից հետո Ախալցխայի շրջանի Ծղալթբիլա, Աբաթխեւ եւ Ծինուբան հայկական գյուղերի երիտասարդներն ավանդույթի համաձայն բարձրացել են տեղի հայերի կողմից կառուցված սրբավայրի մոտ՝ կրակ վառելու եւ այսպիսով հարգելու Հայոց Ցեղասպանության զոհերի հիշատակը: Հասնելով սրբավայր` նրանք հանդիպել են հարեւան Վալե քաղաքից մի խումբ վրացիների, որոնք խնջույք էին կազմակերպել եւ գտնվում էին ոչ սթափ վիճակում: Չհասկանալով հայ երիտասարդների ուզածը՝ վրաց երիտասարդները կռվի են բռնվել նրանց հետ, սակայն որոշ ժամանակ անց հասկացել են միմյանց: