Երուսաղեմի Սուրբ Հարության տաճարում արդեն մեկնարկել են Սուրբ Գերեզմանի վերականգնման լայնածավալ աշխատանքները:
1800-ական թվականներից ի վեր առաջին անգամ է, որ նման մեծ ծավալի նորոգության աշխատանքներն են կատարվում տաճարում:
«Այսօր Սուրբ Գերեզմանն ընդգրկված է Սուրբ մատուռի ընդերքում, որը գտնվում է Հարության Տաճարի Ռոտոնդի կենտրոնում: Մատուռի այս, վաղ 19-րդ դարի վերջից գոյություն ունեցող կերպարի համար պատասխանատու է ճարատարապետ Կոմնինոսը, որը վերականգնել է այն 1808թ. հրդեհից հետո: Այնուամենայնիվ, կառույցը խստորեն տուժել է 1927թ. երկրաշարժից: Վնասվածքներ են կրել նաեւ Ռոտոնդի գմբեթը եւ ամբողջ կոպլեքսի տարբեր մասերը»,- NEWS.am-ի թղթակցի հետ զրույցում պատմում է Հայոց Պատրիարքարանի կողմից աշխատանքային խմբում ներգրավված հայազգի ճարտարապետ Իրինա Բադալյանը:
Հայ ճարտարապետի խոսքով՝ մատուռի շարունակվող փլուզումը կանգնեցնելու համար այն 1947թ. ամրացվել է դրսից մետաղական կարկասով անգլիացիների կողմից. «Ինչպես պարզվեց հետազոտությունների ընթացքում, ամրացումը արդեն չի գործում եւ մատուռը շարունակում է փլուզվել»:
Թերեւս սրանով էր պայմանավորված, որ 2016թ. մարտի 22-ին հայ, հույն եւ կաթոլիկ պատրիարքները Սուրբ Հարության տաճարի մեջ՝ Ս. Գերեզմանի առջեւ, ընթերցեցին նորոգման վերաբերյալ ընդհանուր հայտարարությունը: Ներկա էր նաեւ մասնագիտական ուսումնասիրության խմբի ղեկավար Անտոնիա Մոլոպուլոն: Խումբն արդեն իսկ ստեղծել է Սուրբ Գերեզմանի համակարգչային եռաչափ մոդելը, որի շնորհիվ հնարավոր կլինի նույնությամբ վերանորոգել Գերեզմանը:
Մատուռի ներսում զետեղված Սուրբ Գերեզմանը, ըստ Իրինա Բադալյանի, բարդ կառուցվածք է՝ սահմանափակ, հարուստ նուրբ օրնամենտավորմամբ ներքին տարածքներով: Նախնական գնահատմամբ, ծախսվելու է 3 մլն եվրո. հունական, Կաթոլիկ եւ հայկական պատրիարքարաններից յուրաքանչյուրը 1 մլն եվրո կտրամադրի: Նախատեսվում է աշխատանքներն ավարտել 8-12 ամսվա ընթացքում: Այս ընթացքում Սուրբ գերեզմանը բաց է լինելու ուխտավորների համար: