Ծառայողական մեքենաների կրճատումը նպատակահարմար է, եւ ավելորդ ավտոմեքենաներից ազատվելով` նաեւ ծախսերի կրճատում կարող է լինել: Այս մասին այսօր՝ մայիսի 23-ին, ԱԺ-ում լրագրողների հետ զրույցում նշել է ՊԵԿ փոխնախագահ Արմեն Ալավերդյանը:
«Ուղղակի պետք է որոշել` որ պաշտոնյաները կարող են օգտվել ծառայողական մեքենաներից, որոնք`ոչ: Կարծում եմ` 2016 թվականին պետք է որոշակի տնտեսումների ճանապարհով գնալ»,-ասաց նա:
Դիտարկմանը, թե արդյոք ինքը Հայաստանում տեսնում է ապօրինի մենաշնորհներ, որոնց մասին հայտարարել է վարչապետ Հովիկ Աբրահամյանը, ՊԵԿ փոխնախագահը պատասխանեց, որ մենաշնորհը հասկանում է, իսկ ապօրինի մենաշնորհը չի հասկանում:
Դիտարկմանը, թե գուցե ապրինի մենաշնորհը նա է, որ շաքարավազ ներկրում է մեկ անձ եւ դա որեւէ օբյեկտիվ պատճառ չունի, Ալավերդյանն արձագանքեց. «Եթե շաքարավազի մասին է խոսքը, դա արտադրական նպատակներով ներմուծում են տասնյակ ընկերություններ: Քաղցրավենիք արտադրող խոշոր ընկերություններն էլ իրենք են իրենց համար շաքարավազ ներմուծում, ոչ թե ձեր նշած կազմակերպությունից են ձեռք բերում: Ինչ վերաբերում է մանրածախ վաճառքին, այո, ավելի շատ ներմուծող մեկ ընկերություն կա, եւ որպես ՊԵԿ-ի ներկայացուցիչ, ինձ հետաքրքրում է նրա կողմից վճարված հարկերի մեծությունը: Իսկ որ դա համարենք մենաշնորհ, թե ոչ, դրա համար պետական կառավարման համապատասխան մարմին կա, հանձնաժողով կա, որը պետք է գնահատական տա»:
Հարցին, թե որտեղի՞ց վարչապետին տեղեկատվություն մենաշնորհների մասին, ՊԵԿ-ն է տրամադրում, Ալավերդյանը պատասխանեց. «Կառավարությունը մեծ տեղեկատվական հոսքերի է տիրապետում, պետական տարբեր մարմիններ կարող են անհրաժեշտ տեղեկատվություն տրամադրել, այդ թվում նաեւ ՊԵԿ-ը կարող է մրցունակության, ընկերությունների վճարունակության, փաստացի վճարումների մասին լայնածավալ տեղեկատվություն տրամադրել: Այսինքն՝ հանրապետության վարչապետը մի աղբյուրից չի օգտվում, նա օգտվում է տեղեկատվական բազմազան աղբյուրներից»:
