Այսօր Բրյուսելում ընթանում է «Արեւելյան գործընկերություն» ծրագրի մասնակից երկրների արտգործնախարարների 7-րդ ամենամյա հանդիպումը: Հանդիպումը, որին մասնակցում են Հայաստանի, Ադրբեջանի, Բելառուսի, Վրաստանի Մոլդովայի ու Ուկրաինայի, նաեւ ԵՄ անդամ երկրների արտգործնախարարները, անցնում է ԵՄ բարձրագույն ներկայացուցիչ, փոխնախագահ Ֆեդերիկա Մոգերինիի նախագահությամբ:
Հանդիպմանը ներկա կլինի նաեւ Եվրոպայի Ընդլայնման ու հարեւանության քաղաքականության հարցերով հանձնակատար Յոհաննես Հանը:
Ռիգայում «Արեւելյան գործընկերության» գագաթնաժողովից ուղիղ մեկ տարի անց՝ արտգործնախարարների հանդիպումը հնարավորություն է տալիս ամփոփել արված բարեփոխումները ու վերահաստատել ԵՄ-ի աջակցությունը տարածաշրջանի անվտանգությանը, կայունությանն ու բարգավաճմանը:
Բարեփոխումը շարունակում է մնալ առանցքային Արեւելյան գործընկերության համար եւ ԵՄ-ն ընդունում է, որ յուրաքանչյոր գործընկեր երկիր բարեփոխման իր ուրույն ճանապարհը պետք է անցնի: Վրաստանի, Մոլդովայի ու Ուկրաինայի համար այդ ուղիները ամրագրված են Ասոցացման համապարփակ համաձայնագրերում: Հայաստանի ու Ադրբեջանի հետ նախատեսվում են նոր համաձայնագրեր, իսկ Բելառուսի հետ հարաբերությունները զարգացում են ապրում:
Արեւելյան գործընկերության գագաթնաժողովների համար այս միջանկյալ հանդիպման ընթացքում որոշվելու են նաեւ մինչեւ գալիք տարվա գագաթնաժողով նախատեսվող ծրագրերը: Դրանք ներառելու են նաեւ համագործակցության զարգացում այնպիսի ոլորտներում, որոնցից ամիջապես այդ երկրների քաղաքացիներն են շահելու՝ներառյալ կրթությունը, դասընթացներն ու հետազոտությունները, երիտասարդների զբաղվածությունը, նորարարություններն ու փոխգործակցությունը Erasmus+ եւ Creative Europe եւ Horizon 2020 ծրագրերի շրջանակում: