Լատվիայի արտգործնախարար Էդգար Ռինկեւիչը հայտարարել է Եվրամիության հետ Հայաստանի եւ Ադրբեջանի ասոցացման համաձայնագրի մասին բանակցություններ սկսելու անհրաժեշտությանն մասին։ Բրյուսելում ԵՄ անդամ երկրների եւ «Արեւելյան գործընկերության» ԱԳ նախարարների հանդիպման ժամանակ Լատվիայի արտգործնախարարը ԵՄ-ին կոչ է արել ակտիվորեն աջակցել գործընկերության երկրներին, որոնց քաղաքացիները պետք է ԵՄ-ի հետ համագործակցությունից գործնական օգուտ ունենան, փոխանցում է «ՌԻԱ Նովոստի»-ն։
«Լատվիայի արտգործնախարարն ընդգծել է, որ Հայաստանի եւ Ադրբեջանի ասոցացման մասին նոր համաձայնագրերի շուրջ բանակցություններ պետք է սկսվեն»,- հայտնել են գերատեսչությունից։
Ռինկեւիչն ընդգծել է, որ ԵՄ-ն «Արեւելյան գործընկերության» երկրների հետ պետք է վիզայի չեղարկման եւ ազատ առեւտրի գոտու մասին համաձայնագրեր կնքի։ Նախարարը ԵՄ-ին կոչ է արել ավելի սերտորեն համագործակցել այդ երկրների հետ տրանսպորտի, տարանցիկ փոխանցումների, էներգետիկայի եւ ՏՏ ոլորտում։
«Արեւելյան գործընկերություն» ծրագիրը ԵՄ անդամակցության հնարավորություն չի ընձեռում, սակայն ուղղված է Եվրամիության հետ Հայաստանի, Ադրբեջանի, Բելառուսի, Վրաստանի, Մոլդովայի եւ Ուկրաինայի հետ քաղաքական, տնտեսական ինտեգրմանը։ Թբիլիսին, Քիշնեւն ու Կիեւը արդեն ստորագրել են ասոցացման համաձայնագիրը։