Ուժեղ քամին մայիսի 23-ին, ամբողջությամբ պոկել է Երեւանի Շենգավիթ համայնքի Արտաշիսյան 60 շենքի տանիքը:
NEWS.am-ի թղթակցի հետ զրույցում շենքի բնակիչները նշեցին, որ քամուց հետո տեղացած հորդառատ անձրեւի հետեւանքով իրենց տները ջրի մեջ են:
«Երեխաս պիտի լոդկայով ման գա տանը, որովհետեւ հատակն ամբողջությամբ ջուր է: Տունը նոր եմ վերանորոգել, րոպեների ընթացքում ջուրը լցվեց ու ռեմոնտս փչացավ»,- ասաց բնակիչներից Սուրեն Տոնոյանը, որը բնակվում է 5-րդ հարկում:
Չորս մուտք ունեցող շենքի 12 բնակարանի բնակիչներն այս պահին հայտնվել են անելանելի վիճակում: Համատիրության աշխատակիցները նրանց հորդորել են դիմել թաղապետարանին, ապա քաղաքապետարան:
«Մինչեւ էսքան դիմենք, մոտ երկու ամիս կանցնի, ո՞նց թողնենք էս վիճակում: Մի հատ անձրեւ գա, նորից ջուրը կլցվի մեր տները: Մենք բոլորս սոցիալապես անապահով ենք, չենք կարող մեր միջոցներով տանիքը վերանորոգենք: Բացի դրանից, համատիրությանն էսքան փող մուծում ենք, որ էսօր ասի՝ սպասենք քննարկումների ավարտին»,- բողոքեցին շենքի բնակիչները:
Նշենք, որ այս շենքի պոկված տանիքն ընկել էր բանուկ փողոցի վրա, բնակիչներն անձամբ են հավաքել կոտրված թիթեղները: