2015 թվականին Հայաստանը Եվրասիական միության ընդհանուր մաքսային հավաքագրումներից 17.6 մլրդ դրամի փոխանցում է ստացել (ընթացիկ փոխարժեքով՝ շուրջ 37 մլն դոլար - խմբ.): Այս մասին ասված է 2015 թվականի Հայաստանի պետբյուջեի կատարողականի մասին հաշվետվությունում, որի քննարկումները խորհրդարանում սկսվել են մայիսի 23-ին:
Մինչեւ Եվրասիական միությանն անդամակցությունը՝ 2015 թվականին Հայաստանը հույս ուներ ընդհանուր կաթսայից տարեկան շուրջ 300 մլն դոլար ստանալ՝ ելնելով 2013-ի արդյունքներից: Այդ տարի այն ժամանակվա Մաքսային միության երեք պետությունները 26 մլրդ դոլարի մաքսատուրք էին հավաքագրել, եւ Հայաստանին հասնող 1.13%-ը պետք է շուրջ 294 մլն դոլար կազմեր:
Հաշվի առնելով մակրոտնտեսական պայմանների վատթարացումն ու առեւտրի անկումը՝ Հայաստանը 17.6 մլրդ դրամի տուրք է ստացել, իսկ ինքնուրույն 43.9 մլրդ դրամ է հավաքագրել: Արդյունքում, մաքսատուրքերից մուտքերը կազմել են 61.5 մլրդ դրամ կամ բյուջեի ընդհանուր եկամուտների շուրջ 5.8%-ը: