Արագածոտնի մարզի Աշտարակ քաղաքի բնակչության մի մասը երեկվանից հոսանքազրկված է:
NEWS.am-ի խմբագրություն ահազանգած աշտարակցիները պատմեցին, որ երեկ ժամը 15:00-ից քաղաքի Շիրազի եւ հարակից փողոցի բնակիչները հոսանք չունեն:
«Արդեն մոտ 20 ժամ է՝ մենք հոսանք չունենք: Զանգում ենք ՀԷՑ, ոչ մի հստակ բան չեն ասում»,- ասացին բնակիչները:
ՀԷՑ-ի մամուլի ծառայությունից մեզ հայտնեցին, որ երեկվա ուժեղ քամու հետեւանքով հենասյուներ են վնասվել, ենթակայանից անջատումներ կան:
«Մեր մասնագետները երեկվանից աշխատում են մինչեւ այս պահը, այսօր կվերականգնենք էլեկտրականությունն այդ հատվածում, բայց ժամ նշել չենք կարող»,- հայտնեցին մամուլի ծառայությունից:
Հետաքրքրական է, որ Աշտարակի քաղաքապետարանում տեղյակ չեն, որ իրենց համաքաղաքացիների մի մասն արդեն քանի ժամ է՝ հոսանք չունի: NEWS.am-ի թղթակցին փոխքաղաքապետ Գեւորգ Եղիազարյանը վստահեցրեց, թե իրենց մոտ էլեկտրականության խնդիր չկա:
«Հոսանքի չլինելու կամ հոսանքի անջատման մասին մենք պաշտոնական տեղեկատվություն չունենք, ոչ էլ ահազանգ ենք ստացել»,- ասաց Գեւորգ Եղիազարյանը:
