Արցախի Քաշաթաղի «Տաք ջրեր» կոչվող լիճը, որտեղ օրեր առաջ դեռեւս չպարզված հանգամանքներում 3 երիտասարդ է խեղդվել, ամենայն հավանականությամբ, կցանկապատվի եւ կարգելեն մարդկանց մտնել այնտեղ: Այս մասին NEWS.am-ի թղթակցին ասաց Քաշաթաղի վարչակազմի աշխատակազմի ղեկավար Դավիթ Դավթյանը:
«Նախնական տեղեկություններով՝ երիտասարդները խեղդվել են հենց այդտեղից դուրս եկող գազից: Նախկինում մոտ մեկ ժամ լողալուց հետո էինք թթվածնի պակաս զգում, բայց վերջին շրջանում պարզվում է գազի չափաբաժինն ավելացել էր: Միայն վերջնական եզրակացությունը ցույց կտա, թե ինչ գազ է եղել, բայց առայժմ արգելվում է այնտեղ լողալ»,- ասաց Դավիթ Դավթյանը:
Վարչակազմի աշխատակազմի ղեկավարի խոսքով՝ առաջիկայում տարածքը կցանկապատվի, կողպետք կդրվի՝ ողբերգական միջադեպերից խուսափելու համար:
Նշենք, որ այդ լճից հանքային ջուր է դուրս գալիս:
Ավելի վաղ NEWS.am-ը հայտնել էր, որ 2016թ. մայիսի 21-ին ողբերգական դեպք է տեղի ունեցել Քաշաթաղի «տաք ջրեր» կոչվող լճում: Երեք երիտասարդ դեռեւս չպարզված հանգամանքներում խեղդվել են: Նրանցից մեկը Բերձորից էր, մյուս երկուսը՝ Գորիսից:
