Գյումրիում մայիսի 22-ի լույս 23-ի գիշերը տեղի ունեցած խոշոր ավտովթարի հետեւանքով տուժած ուղեւորների վիճակը կայունանում է:

Գյումրիի բժշկական կենտրոնի փոխտնօրեն Արմեն Խաչատրյանը NEWS.am-ին ասաց, որ վերակենդանացման բաժանմունքում գտնվող տուժածներից մեկը տեղափոխվել է հիվանդասենյակ, երեքի վիճակը կայուն է դրական դինամիկայով:

Հիվանդանոցում բուժում ստացող մեկ տուժած էլ այսօր դուրս է գրվել:

Նշենք, որ տուժածներն են վարորդ 27-ամյա Արկադի Ղարիբյանը, ուղեւորներ 43-ամյա Աշոտ Խուրշուդյանը, 39-ամյա Արկադի Սահակյանը, 29-ամյա Անդրեյ Հակոբյանը, 56-ամյա Աշոտ Խումսոյանը, 28-ամյա Էդգար Հակոբյանը, 37-ամյա Արտյոմ և 32-ամյա Արթուր Միլիտոսյանները: Ուղեւորներից մեկը՝ 56-ամյա Տիգրան Խաչատրյանը հոսպիտալացման ճանապարհին մահացել է:

Տուժածները Գյումրիի Կենտրոնական շուկայի աշխատակիցներ են, միասին գնացել էին Նոր Հաճն՝ հոգեհանգստի: Վթարը տեղի է ունեցել Գյումրի մտնելու ճանապարհին, միկրոավտոբուսը հարվածել է խանութներից մեկի մոտ գտնվող հենասյանը:

Վթարի հանգամանքները պարզվում են: