EgyptAir ավիաընկերության Airbus A320 օդանավի վթարից զոհված ուղեւորների մասունքների անալիզը վկայում է օդանավում պայթյունի մասին, հայտնում է Associated Press-ը՝ վկայակոչելով քրեագետ փորձագետներին:
Նրանց խոսքով՝ դրա հետ մեկտեղ պայթուցիկ նյութի հետքեր դեռ չեն հայտնաբերվել:
Փորձագետներից մեկը, որն անձամբ է մասնակցել մասունքների զննությանը, գործակալությանը հայտնել էր, որ Կահիրե է բերվել դիակների 80 մասունք: «Դրանք բոլորն այնքան մանր են, որ անգամ մեկ մարմնի ամբողջական գլուխ կամ ձեռք չկա: Տրամաբանական բացատրությունն այն է, որ պայթյուն է հնչել», — մեջբերում է Associated Press-ը քրեագետի խոսքը:
Մայիսի 20-ին Եգիպտոսի իշխանությունները գտել էին անհետացած օդանավի ուղեւորներից մեկի դիակի առաջին մասունքը եւ նստատեղից մի կտոր: Նույն օրը հայտնաբերվել էին ուղեւորների անձնական իրերը: Դրանք գտել էին Ալեքսանդրիա քաղաքից 290 կմ հեռավորության վրա՝ Միջերկրական ծովում:
Փարիզ-Կահիրե չվերթն իրականացնող օդանավը ռադարների էկրաններից անհետացել էր մայիսի 19-ին: Օդանավում եղել էին 12 երկրների 66 քաղաքացիներ:
Մայիսի 21-ին Ֆրանսիայի քաղաքացիական ավիացիայի անվտանգության հետաքննությունների եւ վերլուծության բյուրոն հայտնել էր, որ օդանավի ավտոմատ համակարգը կապը կորցնելուց մի քանի րոպե առաջ ծխի առկայության ազդանշաններ է տվել: Փորձագետները դա բացատրում են հրդեհ առաջանալու հանգամանքով, որը կարող էր բռնկվել օդաչուների սրահի մոտ գտնվող զուգարանի խցիկում, հայտնում է Lenta-ն:
