Ոստիկանները գործել են Իտալիայի մի քանի շրջաններում: Ձերբակալվածները սերտ կապեր ունեին «կամորա» իտալական մաֆիայի հետ, կամ գուցե եւ դրա անդամներ էին:
Ոստիկանական գործողություններ ու ձերբակալություններ են եղել ոչ միայն Նեապոլում ու Կազերտայում, որոնք համարվում են մաֆիոզիների սիրելի վայրերը, այլեւ Իտալիայի հյուսիսում՝ Պավիայում ու Վարեզայում: Բացի դրանից Իտալիայի մայրաքաղաքը նույնպես ազատվել է մաֆիայի մի քանի անդամներից, որոնք ստիպված են լինելու որոշ ժամանաակ անցկացնել բանտում, եթե նրանց առնչությունը կամորային ապացուցվի քննության արդյունքում:
Կալանավորվածները մեղադրվում են բազմաթիվ հանցագործությունների համար: Նրանք ոչ միայն եղել են մաֆիոզ համայնքի անդամ, այլեւ թմրադեղերի առեւտուր են արել, գումար շորթել, զենք պահել ու նույնիսկ ազդել ֆուտբոլային խաղերի ելքի վրա:
Մայիսի 23-ին հայտնի է դարձել աղմկահարույց հետաքննության մասին, որը վերաբերում է ֆուտբոլի երկրի առաջնության երկրորդ դիվիզիոնում պայմանավորված խաղեր կազմակերպելու գործին կամորայի մասնակցությանը: