Քաղաքացիական դիտորդական խումբը՝ լրագրողների հետ միասին, մայիսի 26-ին մեկնելու է Թալիշ, խումբը նամակով դիմել է ՀՀ պաշտպանության նախարար Սեյրան Օհանյանին՝ խնդրելով օժանդակել Պաշտպանության բանակի զինվորական հրամանատարների հետ հանդիպումներ կազմակերպելու հարցում:
Նախարարին ուղղված բաց նամակում ասվում է.
«Բաց նամակ ՀՀ պաշտպանության նախարար Սեյրան Օհանյանին
Հարգելի պարոն Նախարար,
Սույն թվականի մայիսի 23-ին Դուք հայտնեցիք հանրությանը, որ Լեռնային Ղարաբաղի Հանրապետության Թալիշ գյուղը անվտանգ է: Սակայն, դրանից մեկ օր առաջ, ԼՂՀ Վարչապետ Արայիկ Հարությունյանը, «Ազատություն» ռադիոկայանին իր տված հարցազրույցում հայտնեց, որ Արցախի իշխանությունները առայժմ նպատակահարմար չեն գտնում քաղաքացիական բնակչության վերադարձը այդ բնակավայր, եւ միջոցներ են ձեռնարկել թալիշցիներին այլ բնակավայրերում բնակեցնելու համար:
Տեղում իրավիճակը գնահատելու համար, պաշտոնական անձանց հայտարարությունների միջեւ առկա հակասության պատճառը բացահայտելու նպատակով, քաղաքացիական դիտորդական խումբ՝ լրագրողների հետ միասին, մայիսի 26-ին մեկնելու է Թալիշ:
Խնդրում ենք Ձեր աջակցությունը՝ Թալիշի հատվածի առաջնագծում ԼՂՀ Պաշտպանության Բանակի զինվորական հրամանատարների հետ հանդիպումներ կազմակերպելու հարցում:
Դիտորդական խմբի անդամներ՝
Անդրիաս Ղուկասյան
Արամ Թարվերդյան
Դավիթ Հովհաննիսյան
Մուշեղ Դանիելյան