Հայաստանում «Կայուն դպրոցական սնունդ» ծրագրից օգտվում են 90 հազար աշակերտներ: Այս մասին նշվել է այսօր՝ մայիսի 24-ին, ՀՀ կրթության եւ գիտության նախարար Լեւոն Մկրտչյանի եւ Հայաստանում ՄԱԿ-ի Պարենի համաշխարհային ծրագրի գրասենյակի ղեկավար Պասկալ Միշոյի՝ Արարատի մարզի դպրոցներ այցելության ժամանակ: Նրանք ծանոթացել են «Կայուն դպրոցական սնունդ» ծրագրի ընթացքին: Դպրոցական սննդի ծրագիրը ՀՀ 3 մարզում՝ Արարատ, Վայոց ձոր եւ Սյունիք, իրականացվում է ՀՀ կառավարության ֆինանսավորմամբ, իսկ մյուս մարզերում՝ Պարենի համաշխարհային ծրագրի օժանդակությամբ: Ծրագրից օգտվում են ՀՀ մարզերի 1-4-րդ դասարանների շուրջ 90 հազար աշակերտներ:
Արարատի մարզի Մասիս քաղաքի թիվ 2 հիմնական դպրոցում ԿԳ նախարար Լեւոն Մկրտչյանին ներկայացվել է դպրոցական սննդի կազմակերպման ողջ ընթացքը՝ սկսած խոհանոցային պարագաների ձեռքբերումից մինչեւ կերակրացանկի հաստատում, սննդի պատրաստում եւ մատուցում: Մասիսի թիվ 2 դպրոցում կազմակերպվում է տաք սնունդ, որից օգտվում է 390 աշակերտ:
Ընդգծելով, որ ծրագրի իրագործումը կառավարության կողմից դիտվում է նպատակային՝ ՀՀ ԿԳ նախարարը նշել է, որ միջազգային գործընկերներն առավել արդյունավետ են համարում տաք սննդի մատուցումը, որն իր մեջ պարունակում է տվյալ տարիքի երեխաների համար նախատեսված կալորիականության անհրաժեշտ չափաբաժին: Կարեւոր նախապայման են համարվում խոհանոցի առկայությունը եւ սանիտարական նորմերի պահպանումը: Նախարարն ընդգծել է, որ դպրոցական սննդի կազմակերպումն ամբողջությամբ գտնվում է մարզպետարանների վերահսկողության ներքո. «Կառավարությունը մտադիր է ընդլայնել ծրագրի շրջանակը. մենք մտադիր ենք նոր ուսումնական տարվանից դպրոցական սննդի ծրագիրն իրականացնել նաեւ Շիրակի, Արագածոտնի եւ Տավուշի մարզերում` որպես սոցիալապես առավել անապահով մարզեր: Իսկ հետագա տարիներին փորձելու ենք առավել ընդլայնել ծրագրի շրջանակը՝ ընդգրկելով բոլոր մարզերը»,- նշել է Լեւոն Մկրտչյանը:
Նախարարի խոսքով՝ փորձը ցույց է տալիս, որ տեխնիկապես ծրագրի իրագործումն ավելի դյուրին է մեծ դպրոցներում, որտեղ կան խոհանոց եւ համապատասխան այլ պայմաններ, մինչդեռ փոքր դպրոցներում խոհանոցներ ստեղծելու համար տարածքներ չկան:
«Համոզված եմ, որ ծրագիրը պետք է շարունակել եւ հասնել նրան, որ ողջ հանրապետության դպրոցներն ընդգրկվեն եւ նույնիսկ ավելի բարձր դասարաններն էլ ներառվեն: Բացի սննդից, ծրագիրն ունի նաեւ դաստիարակչական նշանակություն. ծրագիրը երեխաների մոտ ձեւավորում է կարգապահություն, հացն ընկերոջ հետ կիսելու մշակույթ: Ես ուշադրություն դարձրեցի, որ բոլոր երեխաներն իրենց ափսեները հավաքում են, այսինքն` սա նաեւ դաստիարակություն է»,-իր խոսքում նշել է Լ. Մկրտչյանը:
Պետական ֆինանսավորմամբ յուրաքանչյուր երեխայի համար պետական բյուջեից 1 օրվա համար հատկացվում է 140 դրամ գումար, որից 120 դրամը նախատեսված է սննդի, մնացածը՝ կազմակերպչական աշխատանքի համար: Ծնողական համայնքը սեփական նախաձեռնությամբ շատ դպրոցներում ցուցաբերում է մասնակցություն, որպեսզի երեխաներին տրվող սնունդը ավելի բազմազան եւ հարուստ լինի:
Պարենի համաշխարհային ծրագրի հայաստանյան գրասենյակի ղեկավարը Պասկալ Միշոն Հայաստանում "Կայուն դպրոցական սնունդ" ծրագրի ընթացքը գնահատել է արդյունավետ՝ նշելով, որ 2010 թվականից մեկնարկած ծրագիրն այսօր, բացի մայրաքաղաքից, ընդգրկում է հանրապետության բոլոր մարզերը: Վերոնշյալ երեք մարզերի դպրոցների համար Պարենի համաշխարհային կազմակերպության կողմից հատկացվել են մոտ 400 հազար դոլար արժողությամբ խոհանոցային կահույք եւ սարքավորումներ: