Հայաստանի ԱԳ փոխնախարար Ռոբերտ Հարությունյանը մայիսի 23-ին ընդունեց Հայաստանում Ավստրալիայի նորանշանակ դեսպան Փիթեր Թեշին, (նստավայրը` Մոսկվա)` հավատարմագրերի պատճենի հանձնման կապակցությամբ:
Ողջունելով ավստրալիացի դիվանագետին` ԱԳ փոխնախարարը հաջողություն մաղթեց նրան բարձր առաքելության իրականացման գործում` հույս հայտնելով, որ դեսպանի պաշտոնավարման ընթացքում հայ-ավստրալական հարաբերություններն ամենատարբեր բնագավառներում նոր լիցք եւ որակ կստանան:
Իր հերթին դեսպան Թեշը նշեց, որ Ավստրալիան մշտապես շահագրգիռ է Հայաստանի հետ զարգացնելու ինչպես քաղաքական, այնպես էլ տնտեսական եւ մշակութային փոխգործակցությունը: Նա բարձր գնահատեց Ավստրալիայի հայ համայնքի ակտիվ դերակատարությունը երկկողմ հարաբերությունների սերտացման գործում:
Զրուցակիցները քննարկեցին երկկողմ համագործակցության մի շարք հարցեր` կարեւորելով, մասնավորապես, արդյունավետ համագործակցությունը միջազգային կազմակերպությունների շրջանակներում:
Համոզմունք հայտնելով հայ-ավստրալական փոխշահավետ համագործակցության համար անհրաժեշտ ներուժի առկայության վերաբերյալ, դեսպանը հայտնեց իր երկրի պատրաստակամությունն ընդլայնելու երկկողմ տնտեսական ու գործարար կապերը:
Հանդիպման ընթացքում անդրադարձ կատարվեց տարածաշրջանային եւ միջազգային խնդիրներին:
