Ռուսաստանի եւ Եվրամիության միջեւ հարաբերությունների ներկայիս ճգնաժամը գործընկերների՝ իրական գործընկերության հիման վրա երկխոսություն կառուցելուց հրաժարվելու հետեւանք է: Այս մասին հունգարական «Մադյար նեմզեթ» թերթին տված հարցազրույցում ասել է ՌԴ արտգործնախարար Սերգեյ Լավրովը:
«Ցավոք, Բրյուսելում աշխարհաքաղաքական տարածք նվաճելու կարճատես քաղաքական գիծ է իշխում, այդ թվում՝ «Արեւելյան գործընկերություն» ծրագրի իրականացման միջոցով, ժողովուրդներին «յուրայինների» եւ «օտարների» բաժանելով: Այդ գծի գագաթնակետը Ուկրաինայում պետական հեղաշրջումը պաշտպանելն է», - ասել է Լավրովը:
Լավրովը վստահություն է հայտնել, որ Ռուսաստանի եւ Եվրամիության միջեւ փոխշահավետ գործընկերությունը ողջախոհ այլընտրանք չունի:
«Մեր երկիրը տեսանելի ապագայում ԵՄ-ի համար կմնա էներգետիկ ոլորտում հիմնական գործընկերը», - ասել է նա:
Ընդ որում, Լավրովը նշել է, որ չպետք է լինի այնպիսի բիզնես, երբ Ռուսաստանին պարտադրեն իր շահերին չհամապատասխանող համագործակցության սխեմաներ կամ փաստի առաջ կանգնեցնեն: