Վայոց ձորի Եղեգնաձոր քաղաքում մայիսի 15-ին երեկոյան տեղի ունեցած վիճաբանության եւ դրան հաջորդած դանակահարության դեպքով կան կալանավորվածներ:

NEWS.am-ի տեղեկություններով, 3 երիտասարդ կալանավորվել է, նրանց խուլիգանություն կատարելու մեղադրանք է առաջադրվել:

Ըստ Քննչական կոմիտեի տարածած հաղորդագրության, մայիսի 15-ին՝ ժամը 23:15-ի սահմաններում, «Եղեգնաձոր ԲԿ» են տեղափոխվել Եղեգնաձոր բնակիչներ 25-ամյա Ս. Հարությունյանը՝ «որովայնի թափանցող վերք, ստամոքսի վնասվածք» ախտորոշմամբ, 22-ամյա Լ.Գրիգորյանը՝ «կրծքավանդակի աջ կեսի չթափանցող կույր վերք» ախտորոշմամբ, և Ս.Հովակիմյանը՝ «կրծքավանդակի ձախ հատվածի թափանցող վերք» ախտորոշմամբ։  Վերջինս, գիտակցության չգալով, հիվանդանոցում մահացել է։

Նույն գիշերը՝ ժամը 01:00-ի սահմաններում, «Վայք» ԲԿ են տեղափոխվել 25-ամյա Է. եւ 30-ամյա Ա. Բաբայանները:

Ձեռնարկված միջոցառումների արդյունքում պարզվել է, որ նշված անձինք մարմնական վնասվածքներն ստացել են Եղեգնաձորի Երևանյան խճուղում գտնվող ավտոպահեստամասերի խանութի բակում տեղի ունեցած վիճաբանության ժամանակ։ Բացի այդ, պարզվել է, որ նույն վիճաբանության ժամանակ մարմնական վնասվածք է ստացել նաև Եղեգնաձորի բնակիչ, 45-ամյա Հ.Հովակիմյանը, որը բժշկական կենտրոն չի դիմել:

Դեպքի առթիվ հարուցվել է քրեական գործ Քրեական օրենսգրքի 104-րդ հոդվածի 1-ին մասի, 34-104–րդ 2-րդ մասի 1-ին կետի, 112-րդ հոդվածի 2-րդ մասի 1-ին կետի և 258-րդ հոդվածի 4-րդ մասի հատկանիշներով:

Կատարվում է նախաքննություն: Միջոցներ են ձեռնարկվում՝ միջադեպի բոլոր հանգամանքների, մասնակիցների շրջանակը պարզելու, նրանցից յուրաքանչյուրի գործողություններն անհատականացնելու ուղղությամբ։