Ապրիլյան ռազմական գործողությունների արդյունքում ունեցանք անընդունելի տարածքային կորուստներ եւ տարածքների հանձնման բացվող դուռ, որն արդյունքն է ոչ միայն քառօրյա պատերազմական գործողությունների, այլեւ նրան, որ տարիներ շարունակ հայկական կողմերը զլացան վարել իրապես արդյունավետ արտաքին քաղաքականություն։ Այս մասին այսօր՝ մայիսի 25-ին, լրագրողների հետ հանդիպմանն ասաց ԼՂՀ նախկին արտգործնախարար Արման Մելիքյանը։
«Այդ քնկոտ մոտեցումը մեր երկրի ճատատագրի հանդեպ հանգեցրին նրան, որ մենք կանգնած ենք հայկական շահերի համար բացառապես անընդունելի, կոնկրետ տարածքների դիմաց անորոշ կարգավիճակ ստանալու հեռանկարի դիմաց։ Եթե հայկական կողմերն անհապաղ քայլեր չձեռնարկեն, մեզ համար շատ դառն իրադարձություններ են սպասվում առջեւում»,- ասաց Արման Մելիքյանը։
Նախկին արտգործնախարարի խոսքով՝ Հայաստանի արտգործնախարարության հայտարարությունները, թե հայկական եւ միջազգային հանրության տեսակետները համընկնում է, որեւէ դրական բան չունի․ «Տարածքներ անորոշ կարգավիճակի դիմաց» բանաձեւի գործարկումը կհանգեցնի տարածքների կորստի եւ չի ավելացնի մեր անվտանգությունը, կսպասռի այն անվտանգության ռեսուրսը, որը մենք ունենք, իսկ քաղաքական տեսանկյունից կզրոյացնի Հայաստանի իրական միջազգային վարկը»։
Ինչ վերաբերում է Սերժ Սարգսյանի հայտարարությանը՝ կապված կորցրած 800 հա տարածքի մասին, Արման Մելիքյանը համոզված է՝ երկրի ղեկավարը նման հայտարարություն անելու իրավունք չուներ։
«Լավագույն դեպքում, կարող ենք սա համարել ռազմական գործչի հայտարարություն, որի համար տարածքը կարող է հանձնվել կամ գրավվել, ռազմավարական կամ մարտավարական նշանակություն ունենալ, սակայն ռազմական նախարարի մակարդակով արտահայտվելն անընդունելի է, այս ամեն ինչը պետք է դիտարկվի քաղաքական հարթության վրա։ Նա դաշտային գեներալի չպետք է փոխարինի, իր արտահայտություններով պետք է քաղաքական տեսլականն ասի»։
