Ամերիկյան ազդեցիկ սենատոր հանրապետական Ջոն Մաքքեյնը «Ամերիկայի ձայնը» ռադիոկայանի ադրբեջանական ծառայությանը տված հարցազրույցում Բաքվին կոչ է արել ազատել լրագրող Խադիջա Իսմայիլովային, սպառնալով հակառակ դեպքում քայլեր ձեռնարկել Ադրբեջանի իշխանությունների դեմ: Այս մասին հայտնում է www.contact.az–ը:
Ի՞նչ է անձամբ սենատորի համար նշանակում լրագրող Խադիջա Իսմայիլովայի աշխատանքը, որը հետաքննում էր Իլհամ Ալիեւի եւ նրա ընտանիքի անդամների բիզնեսը ու դրանից հետո կալանավորվել է: Պատասխանելով այս հարցին՝ սենատորն ասաց, որ Խադիջայի կալանքը դուրս է գալիս մեկ անձի սահմանից ու ընդգրկում հարցերի շատ ավելի լայն շրջանակ: «Խոսքը համարձակ ու քաջ կնոջ կողմից կոռուպցիայի բացահայտման մասին է: Կալանավորելով Խադիջային՝ կառավարությունը պայքարում է ժողովրդվարության ու մամուլի ազատության դեմ՝ ցույց տալով բոլորին, թե ինչ է պատահում նման գործունեություն ծավալելու դեպքոմ: Այսպիսով, սա միայն Խադիջայի անձնական պատմությունը չէ, այլ բարեփոխումների անհրաժեշտության վկայություն»,- նշել է սենատորը:
ԱՄՆ Կոնգրեսում քննարկում են Գլոբալ Մագնիտսկի օրինագիծը, որը ուղղված է ամբողջ աշխարհի պետական պաշտոնատար անձանց դեմ, որոնք խախտում են մարդու իրավունքները ու սենատոր Մաքքեյնը այդ փաստաթղթին սատարողներից է: «Եթե իշխանությունները շարունակեն խախտել մարդու իրավունքները, ապա պետք կլինի քայլեր ձեռնարկել Ադրբեջանի կառավարության դեմ: Մագնիտսկու օրենքը վախեցրել է ամբողջ աշխարհի բռնապետներին: Իհարկե, մենք պետք է լրջորեն դիտարկենք նաեւ այդ տարբերակը, բայց ես հույս ունեմ, որ մինչեւ դրան հասնելը Խադիջան ազատ կարձակվի»:
Խադիջա Իսմայիլովայի բանտարկությունը ինչպե՞ս է ազդում երկկողմանի հարաբերությունների վրա: Պատասխանելով այս հարցին՝ սենատորը ասել է, որ անկասկած եթե նրան շարունակեն բանտում պահել, դա բացասական ազդեցություն կունենա: «Կառավարությունը անտեսում է միջազգային նորմերը, շարունակում կալանավորել անմեղ մարդկանց, խախտելով նրանց իրավունքներն ու մամուլի ազատությունը:Այս գործընթացների շարունակությունը մեզ ստիպում է որոշակի քայլեր ձեռնարկել : Իմ ուղերձը Ադրբեջանի իշխանություններին այն է, որ ես իրենց երկրի վաղեմի բարեկամն եմ: Ես շատերին գիտեմ կառավարությունում ու այցելել եմ Ադրբեջան: Այն ինչ նրանք անում են՝ սխալ է: Նրանք վարկաբեկում են ամբողջ ազգին: Ադրբեջանցիները լավ բարի մարդիկ են: Իշխանությունների գործողությունները վնասում են նրանց հեղինակությանը»,- ամփոփել է Ջոն Մաքքեյնը:
