Սա չի կարելի ասել պարտություն է, քանի որ Ադրբեջանը իր ամբողջ հզորությունով, որի սպառազինությունը հասել է գագաթնակետին, էլ հզորանալու տեղ չունի, գիշերը գաղտագողի, ինչպես իրեն հատուկ է, հարձակվել է քնած երկրի, քնած դիրքերի վրա, եւ մի քանի բարձունք կարողացել է առաջ գալ: Այս մասին, այսօր՝ մայիսի 25-ին, ԱԺ-ում լրագրողների հետ զրույցում նշել է ԱԺ պատգամավոր Ռուստամ Գասպարյանը:
Նրա խոսքով, յուրաքանչյուր բանակ, երբ հարձակվում է գաղտագողի, տասնյակ կիլոմետրերով առաջ է գալիս, իսկ մերոնք կարողացել են հենց տեղում խեղդել հարձակումը:
Դիտարկմանը, որ 800 հեկտար տարածք ենք կորցրել, Ռուստամ Գասպարյանն արձագանքել է. «800 հեկտարը մի գյուղի կես չափ է, բայց դուք հաշվի չեք առնում, որ ազատագրված է 7 շրջան, ու կարելի է ասել մսի գնով, իրենց կյանքի գնով թուրքերը առաջ գնացին: Իրականում Ադրբեջանի կողմից զոհերի թվին անցնում է 2 հազարից»:
Հարցին, թե ո՞վ պետք է պատասխան տա կորուստների համար, պատգամավորը պատասխանեց. «Դուք չգիտե՞ք, որ պատերազմի ժամանակ զոհեր են լինում, պատերազմը զոհեր է պահանջում: Տարածքային կորուստների համար պատասխան տվո՞ղ է պետք, պատերազմ է: Մեղավորներ մի փնտրեք: Փառք մեր բանակին, որ կարողացավ նման հզոր հարձակումը տեղում խեղդել: Ամբողջ աշխարհում Ադրբեջանը պետք է գլուխը կախ ման գա, որ չկարողացավ իր պլանները իրականացնել»:
Նա նշեց, որ հնարավոր է, տարածքները հետ վերցնենք: «Ես չէի ասի, որ այդ դիրքերը լուրջ դերակատարություն ունեն: Ընդամենը մի քանի բարձունք է: Թալիշի հատվածում, հա, իրենց հսկողության տակ է ընկնում, իսկ Լալայլյագի բարձունքը ամայի տարածք է, բնակչություն չկա: Մի դիրք էս կողմ էլ էլի բարձունք է, որտեղ մենք ենք նստած»,-ընդգծեց Ռուստամ Գասպարյանը:
«Ես էլ եմ գտնում, որ այդ 2-3 բարձունքի համար պետք չի հարյուրավոր զոհեր տալ: Այդ զոհերը մեր երեխեքն են: Մեծամասշտաբ պատերազմով այդ տարածքները վերցնելու իմաստ չկա: Կլինի ժամանակ ու հնարավորություն, որ ավելի քիչ կորստով հետ կվերցնեն»,-ասել է նա:
