Օգտագործվող տարածքները, որոնք հիմա հայկական կողմի ձեռքում չեն, հյուսիսում եւ հարավում կազմում են 20 եւ 30 հեկտար: Այդ մասին մայիսի 25-ի մամուլի ասուլիսին հայտնել է ղարաբաղյան պատերազմի մասնակից, Կենտրոնական հրամանատարության հետախույզ, հետախույզների հատուկ նշանակության դիվիզիայի հիմնադիր եւ հրամանատար Վովա Վարդանովը՝ պարզաբանելով, որ խոսքը խրամատների գոտու մասին է:
Նրա խոսքով՝ այդ տարածքները հակառակորդի ձեռքում են ժամանակավորապես: «Մենք դրանք չենք կորցրել: Մենք դրանք կկորցնենք միայն այն ժամանակ, երբ համակերպվենք այդ մտքի հետ: Այդ մտքի հետ համակերպվել չի կարելի», - ասել է Վարդանովը:
Այն 700-800 հեկտարը, որոնց մասին շատ են խոսում, խրամատների միջեւ չեզոք գոտին է: «Իհարկե դրանք կարեւոր մետրեր են: Բնականաբար մի դիրքը չի կարող կարեւոր ռազմավարական նշանակություն ունենալ, բայց դա միանշանակ հսկայական մարտավարական եւ օպերատիվ նշանակություն ունի, քանի որ նրանք տեսնում են Թալիշ գյուղի ուղղությամբ թիկունքի մեր դիրքերը: Մարտավարական տեսակետից նրանք կարող են ոչնչացնել մեր տասնյակ զինծառայողներին»,- ասել է Վովա Վարդանովը: