Մարտի սկզբին ծայրահեղ ծանր վիճակում Երեւան տեղափոխված զինծառայող Արամ Սարյանը պարզվում է՝ մինչեւ այդ մի քանի օր ջերմություն է ունեցել, սակայն դիրքերում ջերմիջեցնող հաբեր ընդունելու հնարավորություն չի ունեցել: Ինչպես Արամի հայրն է նշում, դիրքերում դեղ չի եղել:
«Որդիս հետախույզ էր, երկար ժամանակ դիրքերից չէր իջնում: Անձրեւի, ձյան տակ էր ընկել, մրսել, դեղ էլ չէր եղել, որ խմի, շուտ լավանա, էդպես բարդացել էր: Բացի դրանից, փետրվարին ստիպված է եղել դիրքերում լողանալ, սրբիչ չի եղել, որ չորանա ու էդ ժամանակ էլ էր մրսել, կուտակվել, կուտակվել է ու էս վիճակում էր հայտնվել»,- պատմում է Արամի հայրը՝ Խաչիկ Սարյանը:
19-ամյա Արամը բանակ է զորակոչվել 2015թ. հունիսին: Հոր պնդմամբ, առողջական ոչ մի խնդիր չի ունեցել, շատ ուժեղ ու առողջ երիտասարդ է. «Մի քանի օր ջերմությունը չէր իջնում, ներվի բորբոքում էր տվել մրսելուց: Դիրքերից իջեցրել են զորամաս, ապա Ստեփանակերտ, էնտեղից էլ Երեւան: Մարտի 4-ից Երեւանում է, 1.5 ամիս մնացել է հիվանդանոցում»:
Ըստ «Սուրբ Գրիգոր Լուսավորիչ բժշկական կենտրոնի շտապբուժօգնության եւ վերակենդանացման բաժանմունքի վարիչ Սամվել Կարապետյանի՝ խանգարվել էին Արամ Սարյանի կենսական կարեւոր ֆունկցիաները, ջերմությունը բարձրանում էր մինչեւ 38 աստիճան: Հիվանդին անմիջապես արհեստական շնչառական սարք է միացվել, անզգայացել էին վերջույթները, խանգարվել էին ոչ միայն շնչառական, այլեւ կլման ֆունկցիաները։
Տասն օր անց հաջողվել է հասնել նրան, որ արհեստական շնչառության սարքի անհրաժեշտություն չլինի, ընդհանուր վիճակը կայունացել է, վերականգնվել են հիվանդի շնչառությունը, կլման ակտը։
«Արամն ապրիլի վերջին տեղափոխվել է վերականգնողական կենտրոն: Արդեն սկսել է քայլել, 10-15 մետր ինքնուրույն գնում է»,- ասում է զինծառայողի հայրը:
Նշենք, որ Արամի մոտ ախտորոշվել էր սուր բորբոքային դեմիելինիզացնող պոլինեյրոպաթիա կամ Գիյեն Բարե:
Արամ Սարյանն ազատվել է ծառայությունից: