Ամերիկյան Microsoft ընկերությունը մտադիր է ավելի քան 1.3 հազար աշխատատեղ կրճատել Ֆինլանդիայում: Այս մասին ասվում է ընկերության տարածած հայտարարությունում:
«Microsoft-ը կփակի Ֆինլանդիայում գտնվող Microsoft Mobile Oy ընկերությունը, որը զբաղվում է բջջային հեռախոսների մշակումով, այնտեղ աշխատանքից կզրկվի 1350 մարդ: Նրանց փոխհատուցում կտրվի»,- ասվում է ընկերության մամուլի հաղորդագրությունում: Կրճատումները կտարածվեն ամերիկյան ընկերության աշխարհի տարբեր երկրներում գտնվող մասնաճյուղերի եւս 500 աշխատակիցների վրա:
Ավելի վաղ Microsoft–ը հայտնել էր, որ համաձայնության է հասել ընկերությանը պատկանող՝ ավանդական կոճակներով բջջային հեռախոսներ արտադրող ստորաբաժանումների ակտիվները 350 մլն դոլարով վաճառելու հարցով: Այս գործարքի արդյունքում ֆիննական Nokia ընկերությունը հայտարարել է, որ Nokia Technologies–ը HMD Global Oy–ին կփոխանցի Nokia ապրանքանիշի հեռախոսներ ու պլանշետներ ստեղծելու բացառիկ գլոբալ արտոնագիրը:
