Բաքուն պատրաստ է աջակցել Ռուսաստանի եւ Թուրքիայի միջեւ հարաբերությունների բարելավմանը: Այդ մասին Sputnik-Ադրբեջանին տված հարցազրույցում հայտնել է Ադրբեջանի նախագահի հասարակաքաղաքական հարցերով օգնական Ալի Հասանովը:
Ալի Հասանովը հայտնել է, որ Ռուսաստանի եւ Թուրքիայի միջեւ հարաբերություններում լարվածությունը չի կարող չանհանգստացնել Ադրբեջանին, որն այդ պետություններից յուրաքանչյուրի հետ բարձր մակարդակի, ռազմավարական գործընկերության հարաբերություններ ունի:
«Իլհամ Ալիեւը նշել է, որ Ադրբեջանը երկու պետությունների հետ պատմականորեն կապված է սերտ հարաբերություններով եւ այդ լարվածությունից ափսոսանքի եւ անհանգստության զգացում է ապրում: Ադրբեջանի նախագահը հայտնել է, որ ադրբեջանական կողմը պատրաստ է ջանքեր գործադրել Թուրքիայի եւ Ռուսաստանի միջեւ լարվածության նվազեցման եւ վերացման ուղղությամբ», — հայտնել է Ալի Հասանովը:
Նա հայտնել է, որ Բաքուն ջանում է «վերացնել Ռուսաստանի եւ Թուրքիայի հարաբերություններում լարվածությունը… համատեղ գործունեությունը, որն ուղղված է դեպի ապագան, ոչ թե անցյալը, կարեւոր նշանակություն ունի եւ Ադրբեջանի, եւ ամբողջ տարածաշրջանի համար»:
«Ընդհանուր բազմադարյան պատմությունը եւ քաղաքական նոր կապերը, հատկապես անկեղծ հարաբերությունները, փոխադարձ վստահությունը, բարձր մակարդակի երկխոսությունը Ադրբեջանի նախագահ Իլհամ Սլիեւի եւ Ռուսաստանի նախագահ Վլադիմիր Պուտինի միջեւ առաջնակարգ գործոններ են, որոնք պայմանավորում են փոխադարձ համագործակցության հետագա ընդլայնումն այլ ոլորտներում», — ամփոփել է Ալի Հասանովը:
