Բուդապեշտը նշում է ԵՄ-ի կրկնակի ստանդարտները «Հյուսիսային հոսք – 2»-ի եւ «Հարավային հոսքի» վերաբերյալ: Այդ մասին հայտնել է Հունգարիայի արտգործնախարար Պետեր Սիյարտոն, պատասխանելով ՏԱՍՍ-ի հարցին:
«Այն, ինչ այժմ տեղի է ունենում «Հյուսիսային հոսք – 2»-ում ներդրումների առումով, ԵՄ-ի կրկնակի ստանդարտների դրսեւորումն է,-ասել է նա: Եվրամիությունը եւ մեր բարեկամները լուրջ ճնշում են գործադրում մեզ, Բալկանյան եւ Կենտրոնաասիական երկրների վրա, որպեսզի «Հարավային հոսքը» չիրականացվի»:
«Հարավային հոսքը» Հունգարիայի համար դիվերսիֆիկացիա կնշանակեր եւ կնպաստեր մեր երկրի համար էներգետիկ ավելի լավ անվտանգությանը, - շարունակել է նախարարը: Այն ժամանակ փաստարկ հնչեց, թե չի կարելի Ուկրաինան շրջանցող գազամուղ կառուցել եւ նախագիծն արդարացված չէ տնտեսական տեսանկյունից»:
«Այժմ մենք տեսնում ենք, որ այլ գազամուղ կա, որը եւս շրջանցում է Ուկրաինան: Հետաքրքիր է, որ Եվրահանձնաժողովը, մեր բարեկամներն այդքան բարձրաձայն չեն բողոքում, որքան բողոքում էին «Հարավային հոսքի» առումով, - նշել է Սիյարտոն: Այնպես որ, ես այդ «հոսքերում» մի տարբերություն եմ տեսնում` ձեռնարկությունների մասնակցությունը: Այսինքն Եվրահանձնաժողովը կրկնակի ստանդարտներ է կիրառում»: