Էրիկ Բաբայանը, որը Լեռնային Ղարաբաղում ծանր վիրավորվելուց հետո գտնվում է «Էրեբունի» բժշկական կենտրոնում, հերթական վիրահատությանն է ենթարկվել: Այս մասին NEWS.am-ին տեղեկացրեց բուժկենտրոնի տնօրեն Միքայել Մանուկյանը:
Նրա խոսքով, վիրավորվելուց հետո Էրիկի թոքն ուժեղ վնասվել էր, ինչը ժամանակի ընթացքում հանգեցրել էր ձախ թոքային խոռոչի կպումների եւ վիրահատության անհրաժեշտություն առաջացրել:
Վիրահատությունը հաջող է անցել, այժմ Էրիկի վիճակն ընդհանուր առմամբ բավարար է գնահատվում, դրական դինամիկա կա:
Հիշեցնենք, որ Էրիկ Բաբայանին հիվանդանոց էին հասցել ծայրահեղ ծանր վիճակում, աղիների եւ ստամոքսի վիրավորումով: Բժիշկները երկու անգամ վիրահատել են աղիները, հեռացրել նաեւ մի երիկամը, ինչից հետո Էրիկի մոտ սուր երիկամային անբավարարություն է սկսվել, որն էլ հիմա բուժում են: Զինծառայողը նաեւ ձախ ոտքի կոնքազդրային հոդի վնասվածք ունի, եւ էնդոպրոթեզավորում են կատարելու, բայց միայն ներքին բոլոր վերքերը լավանալուց հետո:
