Շվեյցարական Բազել Լանդ կանտոնում մահմեդական աշակերտներին պարտավորեցրել են սեղմել ուսուցիչների ձեռքը: Այս մասին գրում է The Local-ը:
Հրաժարվելու դեպքում նրանց 5 հազար շվեյցարական ֆրանկի չափով (5036 դոլար) տուգանք է սպառնում: Բազելի պաշտոնյաները կարծում են, որ «տղամարդկանց եւ կանանց հավասարության եւ օտարերկրացիների ինտեգրման հարցում հասարակական հետաքրքրությունն ակնհայտորեն ավելի առաջնահերթ է ուսանողների հավատքի ազատությունից»:
Ձեռքսեղմումից հրաժարվելը կգնահատվի որպես այլ անձանց սեփական կրոնի դրույթների կատարումը ստիպելու փորձ: Բացի այդ, շրջանի կրթության, մշակույթի եւ սպորտի բաժնի աշխատակիցները մատնանշել են, որ ձեռքսեղմումը շվեյցարական մշակույթում ավանդույթ է, եւ նրանք, ովքեր հրաժարվեն դրանից, հետագայում կարող են խնդիրներ ունենալ աշխատանքի տեղավորվելիս եւ կարիերա ստեղծելիս:
Ըստ Lenta-ի, նման որոշման առիթ է դարձել Տերվիլ քաղաքի դպրոցներից մեկում բարձրացած սկանդալը, որտեղ երկու աշակերտներ հրաժարվել էին սեղմել ուսուցչուհիների ձեռքը՝ հասկացնելով, որ մահմեդական սովորույթներն արգելում են դիպչել կողմնակի կանանց:
