Եվրահանձնաժողովի նախագահ (ԵՀ) Ժան-Կլոդ Յունկերը Թուրքիայի իշխանություններին կոչ է արել հրաժարվել Եվրամիությանը բարձրագոչ հայտարարություններով վախեցնելուց վիզայի ռեժիմի ազատականացման բանակցություններին ցանկալի արդյունքի հասնելու համար, հայտնում է «ՌԻԱ Նովոստին»:
Մայիսի սկզբին Եվրահանձնաժողովը (ԵՀ) Եվրախորհրդարանին (ԵԽ) եւ ԵՄ-ի Խորհրդին խորհուրդ է տվել հանել վիզայի սահմանափակումները Թուրքիայի քաղաքացիների համար, եթե Անկարան մինչեւ հունիսի վերջ կատարի մնացած պայմանները վիզաները հանելու համար: Դրանց թվում են կոռուպցիայի կանխարգելման միջոցները, Եվրոպոլի հետ օպերատիվ համաձայնագրի վերաբերյալ բանակցությունների անցկացումը, դատական համագործակցությունը բոլոր անդամ երկրների հետ, ահաբեկչության դեմ պայքարում օրենսդրության վերանայումը:
«Ինչ վերաբերում է հակաահաբեկչական օրենսդրության վերաբերյալ պահանջներին, մենք ակնկալում ենք, որ Թուրքիան կկատարի իր պարտավորությունները: Սպառնալիքները դիվանագիտական լավագույն գործիքը չեն օգտագործման համար, յուրաքանչյուրը պետք է հրաժարվի դրանց օգտագործումից, որովհետեւ դրանք ընդհանրապես որեւէ արդյունք չեն տա», — լրագրողներին ասել է Յունկերը Ճապոնիայում «յոթնյակի» գագաթնաժողովի սկզբից առաջ:
Թուրքիայի նախագահ Թայյիփ Էրդողանը ավելի վաղ ԵՄ-ին սպառնացել էր դուրս գալ միգրացիոն համաձայնագրից, եթե Եվրամիությունը երկրի քաղաքացիներին առանց վիզայի ռեժիմ չտրամադրի: Էրդողանը հայտնել է նաեւ, որ Թուրքիան չի վերանայի իր հակաահաբեկչական օրենսդրությունը եւ ԵՄ-ին երկերեսանիության համար է մեղադրել:
Եվրախորհրդարանի պաշտոնական ներկայացուցիչ Մարտին Շուլցը «ՌԻԱ Նովոստիին» հայտնել է, որ ԵԽ-ն Թուրքիայի քաղաքացիներին առանց վիզայի ռեժիմի տրամադրման օրենսդրական գործընթաց կսկսի այն բանից հետո, երբ Անկարան կատարի ԵՄ-ի դրա հետ կապված բոլոր պահանջները, առանց բացառության:
