Ֆրանսիայում ընթացող ատոմային էլեկտրակայանների աշխատակիցների գործադուլը հանգեցրել է 4 գիգավատտ (ԳՎտ) էլեկտրական հզորության կորստի, հայտնում է Ռոյթրզ գործակալությունը` վկայակոչելով ցանցային RTE օպերատորի ներկայացուցիչներին, հայտնում է «ՌԻԱ Նովոստին»:
19 ԱԷԿ-ի աշխատակիցներ նախօրեին հայտնել են աշխատանքի բարեփոխումների դեմ բողոքներին միանալու եւ ուրբաթ գործադուլ անցկացնելու մտադրության մասին: Միաժամանակ RTE-ն նշում է, որ առնվազն 9 ռեակտորի վրա հայտնել են արտապլանային անջատումների մասին:
«Առավոտյան Գրինվիչի ժամանակով 5.00-ին ֆրանսիական ԱԷԿ-ի հզորությունները կրճատվել են առնվազն 4 ԳՎտ-ով», — ասված է հաղորդագրության մեջ:
Վերջին երկու ամսում Ֆրանսիայում կանոնավոր կերպով գործադուլներ են տեղի ունենում, անկարգություններով եւ ոստիկանության հետ բախումներով ուղեկցվող զանգվածային բողոքներ աշխատանքային բարեփոխման դեմ, որի նախագիծը մայիսի 10-ին «ուժով» փոխանցվել է ստորին պալատին:
Փորձագետները համարում են, որ նախատեսված գործադուլները հազիվ թե հանգեցնեն անջատումների եւ էներգամատակարարման ընդմիջումների, որովհետեւ միջուկային արդյունավերությունում գործադուլների իրավական սահմանափակումներ կան, նշում է Ռոյթրզը:
