Էկոնոմիկայի նախարարությունում առաջիկա օրերին հրապարակելու է սպառողների համար կարեւոր 10 ապրանքների ներմուծման համար անհրաժեշտ փաստաթղթերի ցանկերը: Այս մասին մայիսի 26-ին Կաառավարության նիստի ժամանակ հայտնել է Էկոնոմիկայի նախարար Արծվիկ Մինասյանը: Այդ փաստաթղթերով ապրանքներ ներկրել կկարողանա ցանկացած ձեռներեց:
Այդ ապրանքներ են կարագն ու արեւածաղկի ձեթը, ալյուրն ու հացահատիկը, շաքարը, հավի միսը, բանանը ու նարինջը, բենզինն ու դիզելային վառելիքը: Էկոնոմիկայի նախարարությունը առայժմ սահմանափակվում է այս ապրանքներով, համարելով դրանք սպառողների համար ներմուծվող կարեւորագույն ապրանքներ: Միանգամից բոլոր փաստաթղթերի հրապարակման համար ժամանակ է պահանջվում, քանի որ յուրաքանչյուր ապրանքի համար կան մի քանի տարբեր ընթացակարգեր, ըստ առեւտրի ռեժիմի: Հայաստանի արտաքին առեւտուրը բաժանվում է երեք ռեժիմի՝ երրորդ երկրներ առանց կանոնակարգման առանձնահատկությունների, երրորդ երկրներ՝ ազատ առեւտրի մասին պայմանագրերով ու կանոնակարգման առանձնահատկություններով ու վերջապես՝ Եվրասիական միության երկրներ:
ԵՏՄ շրջանակում նույնպես երկու ցանկ կա. առաջինը՝ ապրանքներ ոչ զարգացած երկրներից, արտոնյալ ռեժիմով, երկրորդը՝ ապրանքներ զարգացող երկրներից, որտեղ գործում են արտոնյալ մաքսատուրքեր:
Մինասյանի խոսքով, հաշվի առնելով փաստաթղթերի մեծ ծավալը՝ սկզբում դրանք կհրապարակվեն միայն 10 ապրանքների վերաբերյալ, բայց Նախարարությունը հետագայում կհրապարակի նաեւ սպառողական զամբյուղի մնացած ապրանքներին վերաբերող փաստաթղթերը:
Նշված 10 ապրանքների վերաբերյալ փաստաթղթերի ցանկերը ուղարկվել են Պետեկամուտների կոմիտե ու Սննդամթերքի անվտանգության պետծառայություն՝ դրանց համաձայնեցման համար: Մինչեւ շաբաթվա վերջ փաստաթղթերը կհրապարակվեն www.mineconomy.am կայքում: Բացի դրանից կմշակվի ծրագրային ապահովում, որով Էկոնոմիկայի նախարարության կայքում հնարավոր կլինի որոնել ապրանքի տասանիշ կոդը, ըստ արտաքին տնտեսական գործունեության անվանացանկի:
