Կառավարության նամակների բաժնի պետ Ալեքսանդր Ղազարյանը այսօր՝ մայիսի 26-ին, իջել է Կառավարության շենքի մոտ բողոքի ակցիա իրականացնող Արարատի Մարզի Քաղցրաշեն համայնքի բնակիչների մոտ եւ վստահեցրել, որ խաղողի մթերման դիմաց նրանց գումարները կվճարվեն վաղը, եթե այսօր հեռանան կառավարության շենքի մոտից:
NEWS.am-ի թղթակիցը հայտնում է, որ գյուղացիները չեն համաձայնում հեռանալ կառավարության շենքի մոտից: «Մի քանի անգամ խոստացել են վճարել մեր գումարները, դեռ ապրիլին էին խոստացել, հետո վարչապետը խոստացավ մինչեւ մայիսի 10 տալ մեր փողերը, բայց արդեն հունիսն է սկսվում ու դեռ փող չենք տեսել, մենք չենք հեռանա այստեղից մինչեւ չվճարեն: Ամեն միջոցի կդիմենք, ընդհուպ մինչեւ փողոցներ կփակենք»,- նշել է Քաղցրաշենի բնակիչներից Վարդան Մեսրոպյանը:
Ալեքսանդր Ղազարյանն էլ հայտարարեց, որ եթե վաղը չվճարեն գյուղացիների գումարները, ինքը պատրաստ է միանալ ցուցարարներին:
Կառավարության մոտ է եկել խաղողի մթերումը կազմակերպած «Վինար» ՍՊԸ-ի սեփականատիրոջ որդին՝ Դավիթ Գալստյանը: Նա փորձում է համոզել գյուղացիներին, որ դադարեցնեն ցույցը: Նա վստահեցնում է խաղողագործներին, որ բանկից վարկ ունեն ստանալու մինչեւ վաղը, մի մասի գումարը կվճարեն հենց վաղը, մնացածն ավելի ուշ՝ մինչեւ ամսվա վերջ:
Այս հայտարարությունն էլ ավելի վրդովվեցրեց գյուղացիներին, որոնք պնդեցին, որ չեն հեռանալու մինչեւ իրենց գումարը չստանան:
Նրանք որոշեցին երթով շարժվել դեպի նախագահի նստավայր:
Ավելի վաղ NEWS.am-ը հայտնել էր, որ գյուղացիներն անցած տարվա մթերած բերքի գումարը մինչ օրս չեն ստացել։ Խաղողը մթերած «Վինար» ՍՊԸ-ն քաղցրաշենցիներին, ինչպես նաեւ 10 այլ գյուղերի բնակիչների պարտք է մոտ 160 միլիոն դրամ:
Քաղցրաշենցիներից բացի, «Վինար» ՍՊԸ-ն խաղողի մթերման համար պարտք է Շահումյան, Այգեպատ, Այգեզարդ, Նարեկ, Ոստան, Վերին Արտաշատ, Նորաշեն, Հնաբերդ, Փոքր Վեդի բնակիչներին: