Հայաստանի գլխավոր դատախազությունն օրինագիծ է մշակել, որով առաջարկում է քրեականացնել ընտրախախտումները, խստացնել պատիժները:
Գլխավոր դատախազությունից NEWS.am-ին հայտնում են, որ ՀՀ Գլխավոր դատախազությունում ամփոփվել են ՀՀ Սահմանադրության փոփոխությունների հանրաքվեի ընթացքում տեղի ունեցած ընտրախախտումների դեպքերի քննության արդյունքները, որոնք ներկայացվել են նաեւ ՀՀ նախագահին:
Տվյալների ամփոփման հիման վրա անհրաժեշտություն է առաջացել ՀՀ քրեական օրենսգրքում կատարելու համապատասխան փոփոխություններ եւ լրացումներ:
Ըստ այդմ, ՀՀ դատախազության կողմից մշակվել է ՀՀ քրեական օրենսգրքում փոփոխություններ եւ լրացումներ կատարելու մասին ՀՀ օրենքի նախագիծ, որով առաջարկվում է ընտրական գործընթացում քաղաքացիների ընտրական իրավունքի իրացման դեմ ոտնձգող մի շարք արարքների քրեականացում, ներառյալ՝ ընտրական հանձնաժողովների նախագահների եւ հանձնաժողովի անդամների գործողությունները, եւ պատասխանատվության հստակեցում ու պատժի խստացում:
ՀՀ քրեական օրենսգրքում փոփոխություններ եւ լրացումներ կատարելու մասին ՀՀ օրենքի մշակված նախագիծը ՀՀ գլխավոր դատախազի կողմից առաջիկայում կուղարկվի ՀՀ կառավարություն:
