Նախորդ տարի մթերած խաղողի դիմաց իրենց գումարները պահանջող Արարատի մարզի Քաղցրաշեն եւ հարակից գյուղերի բնակիչները երթով հասել են ՀՀ նախագահի նստավայր:
NEWS.am-ի թղթակիցը հայտնում է, որ ոստիկանները պատնեշել են նախագահի նստավայր տանող ճանապարհը, եւ գյուղացիները խմբված են են նախագահի նստավայրի դիմացի մայթին: Նրանք պահանջում են, որ երկրի նախագահը դուրս գա եւ պատասխանի իրենց հարցերին:
Գյուղացիները հայտարարում են, որ իրենց այնքան են խաբել, թե գումարները կվճարեն, բայց չեն վճարել, որ հիմա այլեւս ոչ մեկին չեն հավատում եւ հենց այս պահին պահանջում են իրենց գումարները:
«Ամեն հինգշաբթի գալիս ենք կառավարության մոտ, ամեն անգամ խոստանում են, որ կվճարեն գումարները, բայց խաբում են: Մենք ուրիշի փողը չենք ուզում: Մեկ կգ խաղողն ընդունել են 40 դրամով, ու նույնիսկ էդ փողը չեն տալիս, բայց հարկերը, ջրի վարձն ուզում են,-ասաց քաղցրաշենցիներից մեկը:
Ասօր ավելի վաղ Կառավարության մոտ ցուցարար գյուղացիներին էր մոտեցել խաղողի մթերումը կազմակերպած «Վինար» ՍՊԸ-ի սեփականատիրոջ որդին՝ Դավիթ Գալստյանը: Նա վստահեցնում էր խաղողագործներին, որ բանկից վարկ ունեն ստանալու մինչեւ վաղը, մի մասի գումարը կվճարեն հենց վաղը, մնացածն ավելի ուշ՝ մինչեւ ամսվա վերջ:
Ավելի վաղ NEWS.am-ը հայտնել էր, որ գյուղացիներն անցած տարվա մթերած բերքի գումարը մինչ օրս չեն ստացել։ Խաղողը մթերած «Վինար» ՍՊԸ-ն քաղցրաշենցիներին, ինչպես նաեւ 10 այլ գյուղերի բնակիչների պարտք է մոտ 160 միլիոն դրամ:
Քաղցրաշենցիներից բացի, «Վինար» ՍՊԸ-ն խաղողի մթերման համար պարտք է Շահումյան, Այգեպատ, Այգեզարդ, Նարեկ, Ոստան, Վերին Արտաշատ, Նորաշեն, Հնաբերդ, Փոքր Վեդի բնակիչներին: