Հայաստանի եւ Ադրբեջանի միջեւ մոտ ժամանակներս ստորագրվելու համար պատրաստի փաստաթուղթ դեռ չի կարող գոյություն ունենալ: Այս մասին մայիսի 26-ին՝ խորհրդարանում 2015-ի բյուջեի կատարողականի հաշվետվության ժամանակ, ասել է ՀՀ արտգործնախարար Էդվարդ Նալբանդյանը:
Անդրադառնալով ԲՀԿ ղեկավար Նաիրա Զոհրաբյանի հարցին՝ Նալբանդյանը նշեց, որ ԵԱՀԿ ՄԽ համանախագահող երկրների արտգործնախարարների ներկայությամբ կողմերի պայմանավորվածությունները նրանք են, ինչ հրապարակվել է եռակողմ հայտարարությաան մեջ: Հայտարարությունը հնգակողմ չի դարձել, քանի որ Ադրբեջանը հրաժարվել է միանալ դրան: Հայտարարության մեջ նշված են այն պայմանավորվածությունները, որոնք ստանձնել են կողմերը: Դա հրադադարի մասին եռակողմ անժամկետ համաձայնագրին հետեւելն է եւ ԵԱՀԿ գործող նախագահի անձնական ներկայացուցչի աշխատակազմի լիազորությունների ընդլայնումը:
Բանակցությունների մյուս փուլը կլինի հունիսին, դրանց անցկացման վայրը դեռ հայտի չէ: Պարզ է, որ բանակցությունների վերսկսման համար պայմաններ են պետք: «Ես մեկ անգամ չեմ ասել, որ դրանք Հայաստանի կողմից նախապայմաններ չեն: Խոսքը բանակցությունների համար անհրաժեշտ պայմանների մասին է, որոնց մասին ասել է համանախագահների եռյակը, եւ այն պարտավորությունների, որոնք ստանձնել են կողմերը: Եթե այդ պայմանները ստեղծվեն, մշտադիտարկման հնարավորություններ ստեղծվեն եւ ընդլայնվեն ԵԱՀԿ ներկայացուցչի լիազորությունները, ապա հնարավոր կլինի սկսել այդ բանակցությունները: Հիմա ջանքեր են գործադրվում հենց այդ ուղղությամբ», - ասել է նախարարը:
Նրա խոսքով՝ հունիսի սկզբին նախատեսված է ԵԱՀԿ ՄԽ համանախագահների առանձին հանդիպումները ՀՀ եւ Ադրբեջանի ղեկավարների հետ: Հնարավոր է, այդ հանդիպումների ժամանակ կողմերը շարունակեն քննարկել Վիեննայում ձեռք բերած պայմանավորվածությունների լիարժեք իրականացման հարցերը: Եվ դա հնարավորություն կտա ճանապարհ հարթել բանակցությունների հաջորդ փուլի համար, եւ, ինչու ոչ, բարձրագույն մակարդակով հանդիպման համար: «Ձեռք բերած համաձայանությունները հանդիպման ձեւաչափի սահմանափակումներ չեն դնում: Բացառված չէ, որ եթե բոլոր պայմանները ստեղծվեն, ապա հնարավոր է, որ նման հանդիպում կայանա: Բայց երբ մենք խոսում ենք բանակցությունների վերսկսման համար անհրաժեշտ բանակցություններից, ապա ինչ-որ բան ստորագրելու մասին խոսելը ոչ միայն վաղաժամ է, այլ ուղղակի չկա որեւէ փաստաթուղթ, որը կարելի է ստորագրել: Բանակցությունների նպատակը կարգավորման նոր ուղղություններ եւ սկզբունքներ մշակելն է», - ասել է Նալբանդյանը:
