Հայաստանն ու Եվրամիությունը բնականոն հունով շարունակում են բանակցությունները՝ համագործակցության մասին նոր շրջանակային փաստաթուղթ կնքելու համար: Այս մասին մայիսի 26-ին ասել է արտգործնախարար Էդվարդ Նալբանդյանը 2015-ին պետբյուջեի կատարման մասին հաշվետվության ընթացքում՝ խորհրդարանական հանձնաժողովների համատեղ նիստի ժամանակ:
Մեկնաբանելով Հայաստանում Եվրահանձնաժողովի ներկայացուցչության ղեկավար Պյոտր Սվիտալսկու այն հայտարարությունը, որ Հայաստանի ու ԵՄ–ի միջեւ նոր համաձայնագրի վերաբերյալ բանակցություններում բարդություններ կան, Նալբանդյանը նշեց.«Ես այդպես չէի ասի: Ցանկացած բանակցություններում կան բարդություններ, որոնք իհարկե կողմերը փորձում են հաղթահարել: Կան նաեւ խնդիրներ: Բայց երբեք չի եղել այնպես, որ կողմերից մե՛կն այդպես հայտարարի: Եթե Սվիտալսկին կարծում է, որ սա ճնշման ձեւ է, ապա դա վատ ձեւ է: Ես վերջերս հանդիպել եմ նաեւ Յոհաննես Հանի ( ԵՄ ընդլայնման քաղաքականության հարցերով եվրահանձնակատար-խմբ) եւ տիկին Մոգերինի ( ԵՄ արտաքին քաղաքականության հարցերով բարձրագույն ներկայացուցիչ-խմբ) հետ: Մենք փոխադարձաբար եւ բավականաչափ գոհ ենք բանակցությունների երեք փուլերից ու շուտով կշարունակենք գործընթացը»:
Արտգործնախարարի խոսքով որոշակի ժամկետներ չկան, բայց հայկական կողմն անում է հնարավոր ամեն ինչ, որպեսզի բանակցությունները հնարավորինս շուտ ավարտվեն: Ընդ որում աշխատանքները չեն սահմանափակվել ապագա փաստաթղթի մասին բանակցություններով: Վերջին ժամանակաշրջանում Հայաստանը միացել է ԵՄ մի շարք ծրագրերի՝ Horizon 2020 եւ այլն : «Ի դեպ, նույնիսկ ԵՄ հետ ասոցացման մասին համաձայնագիր ստորագրած երկրներից ոչ բոլորն են միացել այդ ծրագրերին»,- նկատեց Նալբանդյանը :
Նա հիշեցրեց, որ ավելի քան երկու տարի է գործում է ռեադմիսիայի ու վիզային ռեժիմի պարզեցման գործընթացը ու Բրյուսելում վերջին հանդիպումը ( ԵՄ եւ «Արեւելյան գործընկերություն» ծրագրի երկրների արտգործնախարարների) հստակ պատկերացում տվեց այն մասին, որ քննարկվում է երկխոսության հնարավոր մեկնարկը, որը ուղղված է լինելու Հայաստանի ու Եվրամիության վիզային ռեժիմի ազատականացմանը: «Մեր երկխոսությունը բավականին հագեցած ու բազմակողմանի է ու մենք շահագրգռված ենք, որ խորացնենք համագործակցությունը բոլոր հնարավոր ուղղություններով»,- ամփոփեց Էդվարդ Նալբանդյանը:
