Մատաղիսի զորամասերից մեկի մարտական դիրքում հայտնաբերվել է ժամկետային զինծառայող Վահե Եղոյանը՝ գլխի հրազենային վիրավորումով: Հոսպիտալ տեղափոխվելու ճանապարհին նա մահացել է: Առայժմ հայտնի չէ, թե ինչ հանգամանքներում է դեպքը պատահել: Վահեն  Արարատի մարզի Նորաբաց գյուղից էր: Ունի երկու եղբայր, որոնցից  մեկը՝ երկվորյակ: 19-ամյա Վահեն 10 ամիս առաջ էր զորակոչվել, դեպքից ընդամենը մեկ ժամ առաջ հեռախոսով խոսել էր ծնողների հետ ու ասել, որ ամեն ինչ լավ է:

Նույն օրը ցերեկը զինված ուժերում ևս մեկ մահ է եղել: Ժամկետային զինծառայող, սերժանտ Հակոբ Գեւորգյանը՝ կրծքավանդակի կտրած ծակած վերքով տեղափոխվել է Մեղրիի բուժկենտրոն, ճանապարհին մահացել: Նախաքննության տվյալներով՝ դեպքի օրը Հակոբը վիճաբանելն է ծառայակցի հետ։ Վիճաբանությունը վերածվել է ծեծկռտուքի, որի ժամանակ ծառայակիցը սուր գործիքով հարվածել է Գեւորգյանի կրծքավանդակին: Կասկածյալը ձերբակալված է։

Այսօր նախագահ Սերժ Սարգսյանի կողմից պարգևատրվել են 2015-ին տարբեր  բնագավառներում նշանակալի ավանդ ներդրած գործիչներ:

Ամերիկահայ գրող, Պուլիտցերյան մրցանակակիր Փիթեր Բալաքյանը մրցանակը ստացել է Ցեղասպանության ճանաչման գործում ունեցած ավանդի համար: Ամերիկահայ գրողը, որը աշխարհի ամենահեղինակավոր գրական մրցանակին արժանացել է Հայոց ցեղասպանության մասին «Օզոնի օրագիր» գրքի համար, համոզված է, որ մշակույթը կարեւոր դեր կարող է կատարել միջազգային ճանաչման գործում:

Մրցանակներ են ստացել նաեւ եգիպտոսցիներ Մոհամեդ Հանաֆի Նասրին ու Միրիամ Զաքին: Նրանց հեղինակած  «Ո՞վ սպանեց հայերին» վավերագրական ֆիլմը Հայոց ցեղասպանության մասին առաջին արաբալեզու ֆիլմն է:

Կառավարությունը մերժել է  Թեւան Պողոսյանի հեղինակած օրինագիծը, որով պատգամավորն առաջարկում էր զինծառայողների համար սերմնահեղուկի բանկ ստեղծել, որպեսզի զինծառայողների մահվան դեպքում հնարավոր լինի ապահովել նրանց՝ սերունդ թողնելու իրավունքը: Կառավարությունը իր մերժումը հիմնավորել է իրավական համապատասխան կարգավորումների բացակայությամբ:

Արարատի մարզի Քաղցրաշեն գյուղի բնակիչներն այսօր կրկին կառավարության շենքի մոտ էին: Նրանք պահանջում են անցած տարվա մթերած խաղողի պարտքը վճարել: Գյուղացիների խոսքով՝ վարչապետը խոստացել էր, որ մինչեւ մայիսի 10-ը պարտքը կմարվի, սակայն խոստումը չի կատարել։ Կառավարության մոտ մի քանի ժամ իրենց բողոքը ներկայացնելուց հետո, գյուղացիներն ակցիան շարունակել են նախագահականի մոտ, որտեղ նրանց ճանապարհել են հերթական խոստումով՝ մինչեւ հունիսի 1-ը կվճարեն։ Գյուղացիները հեռացել են՝ սպառնալով, որ վերջին հնարավարությունն են տալիս, եթե չվճարեն, կփակեն Արտաշատի ճանապարհը։ Նշենք, որ Քաղցրաշենի խաղողագործներին «Վինար» գինու գործարանի սեփականատեր Ավետ Գալստյանը պարտք է 70 միլիոն դրամ, իսկ հարակից գյուղերի բնակիչներին՝ 50 միլիոն։

Վազգեն Սարգսյանի անվան ռազմական ինստիտուտի կուսանտ Հայկազ Բարսեղյանի սպանության ականատես, նրա համակուրսեցի Տիգրան Դեմիրճյանն այսօր դատարանում ցուցմունք է տվել: Նա պատմել է, որ տեսել է՝ ինչպես են սենյակում չորս հոգով Հայկազին ծեծում, սակայն չի միջամտել ու թաքնվել է՝ վածենալով, որ իր հետ էլ նույն կերպ կվարվեն: Նա լսել է, որ Հայկազը հայհոյել է, ապա փսխել: Դրանից հետո Հայկազի ձայնը չի լսել, տեսել է՝ ինչպես են նրան քարշ տալով տանում սենյակից:

Տիգրան Ուրիխանյանը կարծում է, որ իրեն ու իր ընտանիքին վտանգ է սպառնում: Պատգամավորը դիմել է ոստիկանություն՝  իր եւ իր ընտանիքի անդամների անվտանգությունը լրացուցիչ ապահովելու հարցով: Ուրիխանյանը չի պարզաբանել, թե կոնկրետ ինչ վտանգ է սպառնում իրեն, հայտնի է միայն, որ խոսքը շորթման մեջ մեղադրվող՝ Analitik.am կայքի տնօրենի գործի  մասին է, որում պատգամավորը ներգրավված է որպես տուժող կողմ:

Ողբերգական ավտովթար է տեղի ունեցել Արարատի մարզում: Mercedes-ը Արալես գյուղի տարածքում դուրս է եկել ճանապարհի երթևեկելի գոտուց և բախվել հաստաբուն ընկուզենուն: Վթարի հետևանքով 17-19-ամյա չորս պատանի տեղափոխվել է հիվանդանոց, որտեղ նրանից երկուսը՝ Հովհաննես Ալավերդյանը և Գոռ Հակոբյանը մահացել են: Մյուս երկու վիրավորներին տեղափոխել են Երևան:

Նախօրեին երկու սարսափելի հանցագործություն է կատարվել՝ մեկը Երևանում, մյուսը՝ Արմավիրում:

Երեւանի 48-ամյա բնակիչ Արմեն Առաքելյանը ձերբակալվել է 82-ամյա հորը սպանելու կասկածանքով: Ոստիկանությունում Արմենը պատմել է, որ հոր խնդրանքով նրան երկու անգամ «Կետոնալ» ցավազրկող է ներարկել՝ 45 րոպե ընդմիջումով, թեեւ գիտեր, որ այդ դեղը կարելի է ներարկել  առնվազն 6 ժամ ընդմիջումով. հետո տնից դուրս է եկել: Երկու ժամից վերադառնալով՝ տեսել է, որ հայրն ընկած է մահճակալի դիմաց եւ ծանր է շնչում: Շտապօգնություն կանչելու փոխարեն՝ շորով կապել է հոր պարանոցից, նրան բարձրացրել անկողնու վրա եւ ոչ մի օգնություն ցույց չի տվել: Մահացածի մարմնի  վրա հայտնաբերվել են վնասվածքներ՝ ձախ աչքի արյունազեղում եւ քերծվածքներ՝ գլխի ու պարանոցի հատվածներում:

Իսկ Արմավիրում 46-ամյա կինը նախնական տեղեկություններով կացնահարել է 76-ամյա մորը, որի վիճակը հիմա ծայրահեղ ծանր է: Գյուղապետարանից հայտնել են, որ կասկածյալը հոգեկան խնդիրներ ուներ, ապրում էր մոր հետ ու երկար տարիներ տնից դուրս չէր գալիս:

Երեւանում մեկ օրում ինքնասպանության երկու փորձ է գրանցվել: Բաշինջաղյան փողոցում մի տղամարդ ինքն իրեն հրկիզել է: Այրվող քաղաքացուն նկատել է մոտակա ավտոլվացման կետի աշխատակիցը: Մինչեւ փրկարարների ժամանելը քաղաքացիները մարել են հրդեհը: Անձը չպարզված քաղաքացին մաշկի 95 եւ շնչուղիների 20 տոկոս այրվածքներով տեղափոխվել է հիվանդանոց: Նրա վիճակը ծայրահեղ ծանր է:

Այսօր կեսօրին Բժշկական համալսարանի մոտ գտնվող վերգետնյա անցումի վրա 22 տարեկան երիտասարդը  փորձել է ինքնասպան լինել՝ կտրելով դաստակի երակները: Բարեբախտաբար, կատրվածքը մակերեսային է եղել, շտապօգնության աշխատակիցները վերջինիս տեղում ցուցաբերել են օգնություն: Պարզվել է՝ երիտասարդը Բժշկական համալսարանի ուսանող էր:

Վերջին զանգին ընդառաջ ոստիկանությունը հորդորել է շրջանավարտներին հասարակական վայրերում լինել զուսպ ու հարգալից միմյանց նկատմամբ, ձեռնպահ մնալ մեքենա վարելու գայթակղությունից, իսկ ծնողներին կոչ է արել երեխաներին մեքենա չվստահել՝ նշելով, որ վաղը ամբողջ օրը խստացված հսկողություն է լինելու փողոցներում: Ի դեպ, Հայաստանի բոլոր դպրոցներում «Վերջին զանգի» արարողությունը կսկսվի մեկ րոպե լռությամբ. շրջանավարտները կհարգեն զոհված զինծառայողների հիշատակը:

Այսօր բոլոր հիմնական արտարժույթների փոխարժեքներն աճել են: Դոլարի փոխարժեքը կազմել է 477, ռուբլունը՝ 7.32, եվրոյինը՝ 534, ֆունտինը՝ 702 դրամ:

Երեւանում մայիսի 27-ի գիշերվա առաջին կեսին եւ երեկոյան ժամերին սպասվում է կարճատեւ անձրեւ եւ ամպրոպ: Առաջիկա գիշերը մայրաքաղաքում կդիտվի +13+15, իսկ վաղը ցերեկը՝ +25+27 աստիճան տաքություն։