Այլեւս մենք Ընտրական օրենսգրքի շուրջ ունենք լայն կոնսոլիդացիա։ Այդ մասին այսօր՝ մայիսի 26-ին ՀՀԿ ԳՄ նիստից հետո լրագրողների հետ զրույցում ասել է ՀՀԿ մամուլի քարտուղար, ԱԺ փոխնախագահ Էդուարդ Շարմազանովը։
Նա նշել է, թե ԳՄ նիստում քննարկել են իրավիճակը շփման գծում, նախագահը ներկայացրել է վերջին շաբաթվա զարգացումները, անվտանգության ապահովման միջոցառումների ընթացքը։
Դիտարկմանը, թե ընդդիմադիր որոշ ուժեր պնդում են, թե 3-րդ ընթերցմամբ ընդունված Ընտրական օրենսգրքի շուրջ կոնսենսուս չի եղել, Շարմազանովը նկատել է, թե ժողովրդավարությունը բազմակարծություն է, եւ ամենաժողովրդավարական երկրներում անգամ 100 տոկոսանոց կոնսենսուս չի լինում։ «Ընտրական օրենսգիրքն ընդունվել է 102 ձայնով, եւ բոլոր խմբակցություններից, բացի ՕԵԿ-ից, կողմ քվեարկողներ են եղել»,- նշել է նա՝ արձանագրելով, թե այլեւս Ընտրական օրենսգրքի շուրջ կա լայն կոնսոլիդացիա։
Շարմազանովը նաեւ վստահություն է հայտնել, որ Գերմանիայի խորհրդարանը հունիսի 2-ին կընդունի Հայոց ցեղասպանությունը դատապարտող բանաձեւը։ «Գերմանիան գերտերություն է, եւ նրա կողմից Հայոց ցեղասպանության ճանաչումը շատ կարեւոր է»,- նշել է նա եւ հավելել. «Գոնե մեր գերմանացի գործընկերները նշում են, որ հստակ են իրենց սկզբունքներում։ Հունիսի 2-ին կհետեւենք իրադարձություններին, եւ կարծում եմ՝ մեկս մյուսին շնորհավորելու առիթ կունենանք»։