Մայիսի 26-ին, ժամը 22.05-ին, ոստիկանության Կոտայքի բաժնում ահազանգ է ստացվել, որ Առինջ գյուղի 6-րդ փողոցի տներից մեկը մտած տղամարդը բենզին է լցրել տանտիրոջ վրա եւ դանակով հարվածել:
Ոստիկանության մամուլի ծառայությունից NEWS.am-ին հայտնում են, որ նույն օրը, ժամը 23.30-ին, հիվանդանոցից հաղորդում է ստացվել, որ «որովայնի առաջնային պատի կտրած-ծակած վերք» ախտորոշմամբ բուժօգնության է դիմել 61-ամյա Գագիկ Փ.-ն, իսկ ժամը 23.40-ին «գլխուղեղի ցնցում հարցականով, գլխի գագաթային շրջանի սալջարդ վերքեր» ախտորոշմամբ իրենց է դիմել 55-ամյա Վիրաբ Ղ.-ն:
Մեկնած օպերատիվ խումբը պարզել է, որ նույն օրը, ժամը 21.55-ի սահմաններում, Վիրաբ Ղ.-ն Գագիկ Փ.-ի գույքը հափշտակելու նպատակով, դիմակավորված, ցանկապատից մուտք է գործել հիշյալ տան բակ եւ հանդիպելով Գագիկ Փ.-ին՝ խաղալիք ատրճանակի եւ դանակի գործադրման սպառնալիքով փորձել է նրա եւ ընտանիքի անդամներից գումար հափշտակել:
Առաջացած քաշքշուկի ընթացքում Վիրաբ Ղ.-ն իր հետ կապրոնե տարայով բերած բենզինը լցրել է Գագիկ Փ.-ի վրա, այնուհետեւ խոհանոցային դանակով հարվածել նրա որովայնին: Այդ ժամանակ օգնության հասած Գագիկ Փ.-ի որդին` 24-ամյա Սուրեն Փ.-ն, մուրճով հարվածել է Վիրաբ Ղ.-ի գլխին:
Նույն օրը, ժամը 23.30-ին, Վիրաբ Ղ.-ն բերման է ենթարկվել բաժին:
Խուզարկությամբ նրա մոտ հայտնաբերվել է կպչուն ժապավեն, պարան, իսկ դեպքի վայրից առգրավվել է հանցագործության գործիք խոհանոցային դանակը, ձեռնոցներ, դիմակ ու խաղալիք ատրճանակի կտորներ:
Հանգամանքները պարզվում են:
Կատարվում է քննություն: