Մենք լիահույս ենք, որ, ինչպես մեր երկրում, այնպես էլ Եվրոպայում եւ ամբողջ աշխարհում քրիստոնեությունը առավել պիտի հաստատվի եւ տարածվի: Այս մասին, մայիսի 26-ին, Բուլղարիայի հայոց թեմի առաջնորդ Տ. Իսահակ վարդապետ Պողոսյանի հետ հանդիպման ժամանակ նշել է Բուլղար ուղղափառ եկեղեցու պատրիարք եւ Սոֆիայի մետրոպոլիտ Նորին Սրբություն Նեոֆիտը:
Մայր Աթոռից NEWS.am-ին հայտնում են, որ հոգեշնորհ Հայր Սուրբը ողջունել է պատրիարք Նեոֆիտին եւ նրան փոխանցել Ամենայն Հայոց Կաթողիկոս Ն.Ս.Օ. Տ.Տ. Գարեգին Բ հայրապետի եղբայրական ողջույնը: Առաջնորդական ընտրությունից հետո, սա Հայր Իսահակի առաջին այցելությունն էր Բուլղարիայի պատրիարքին, որի ընթացքում խոսվել է նաեւ Նեոֆիտ պատրիարքի հրավերով Վեհափառ հայրապետի հավանական հայրապետական այցելության մասին:
Հոգեշնորհ Հայր սուրբը ներկայացրել է իր տպավորությունները Բուլղարիայում, մասնավորապես նշելով. «Այս յոթ ամիսների ընթացքում, ինչ գտնվում եմ Բուլղարիայում, վստահորեն կարող եմ հաստատել, որ Ձերդ Սրբությունը բարձր հեղինակություն է բուլղար ժողովրդի համար եւ Դուք, ինչպես նաեւ Բուլղար ուղղափառ եկեղեցին, վայելում եք Ձեր ժողովրդի սերն ու հարգանքը»:
Նորին Սրբությունն իր հերթին ողջունել է Բուլղարահայոց առաջնորդին` մաղթելով բազմարդյուն առաջնորդություն: «Մենք լիահույս ենք, որ, ինչպես մեր երկրում, այնպես էլ Եվրոպայում եւ բոլոր աշխարհում քրիստոնեությունը առավել պիտի հաստատվի եւ տարածվի», – իր խոսքում նշել է Նեոֆիտ պատրիարքը:
Հանդիպմանը ներկա են եղել Բուլղարիայի կրոնական համայնքների Ազգային խորհրդի ատենապետ Ռուբեն Գրիգորյանը եւ Բուլղարիայի Հայ Դատի հանձնախմբի համաատենապետուհի Տիկին Վարդանուշ Թոփակբաշյանը:
Բուլղար ուղղափառ եկեղեցու կողմից հանդիպմանը մասնակցել են Սուրբ Սինոդի գլխավոր քարտուղար Գերասիմ վարդապետը, ավագ լուսարար Վասիլի Սարյանը եւ պատրիարքարանի վարչակազմի ղեկավար Թոդոր Աթանասովը: Հանդիպման ավարտին Տ. Իսահակ վարդապետ Պողոսյանը Նորին Սրբություն պատրիարք Նեոֆիտին նվիրել է որոշ հուշանվերներ Սուրբ Էջմիածնից եւ մյուռոնաթափ աղավնու կրկնօրինակ: Հանդիպումն անցել է ջերմ մթնոլորտում:
