Մարտունի - Վարդենիս - Սոթք - ԼՂՀ սահման մայրուղու ընդամենը 5 կմ ճանապարհահատվածն է անմխիթար վիճակում: Այս մասին նշել է ՀՀ տրանսպորտի եւ կապի նախարարության «Տրանսպորտի ԾԻԳ» պետական հիմնարկի տնօրեն Էմիլ Սարգսյանը՝ անդրադառնալով հասարակության մեջ առկա դժգոհությանը, թե անմխիթար վիճակում են մի շարք ռազմավարական նշանակության ճանապարհներ, ինչը ցայտուն երեւաց ապրիլյան պատերազմի օրերին:
Նրա խոսքով, այդ ճանապարհը ներառված է Համաշխարհային բանկի միջոցներով նախատեսված ծրագրում եւ կհիմնանորոգվի այս տարի:
Ինչ վերաբերում է Սիսիան-Գորիս ճանապարհահատվածին, Սարգսյանը նշեց, որ դա մաս է կազմում «Հյուսիս-հարավ ճանապարհային միջանցքի ներդրումային ծրագրի», ուստի` մեծ գումարներ ներդնել դրա հիմնանորոգման համար, հետո քանդել, կլինի գումարի վատնում, հետեւաբար պետական բյուջեով նախատեսվել է համապատասխան գումար այն մասնակի վերանորոգելու համար:
«Իսկ Վանաձոր-Ալավերդի-Վրաստանի սահման (Մ 6) ճանապարհահատվածը հիմնանորոգելու նպատակով բանակցություններ են վարվել մի շարք դոնոր կազմակերպությունների հետ: Արդյունքում երկու դոնորի` Եվրոպական ներդրումային բանկի եւ Ասիական զարգացման բանկի հետ համաձայնություն է ձեռք բերվել: Ծրագիրը կազմում է մոտ 100 միլիոն եվրո, որի մի մասը կիրականացվի Եվրոպական ներդրումային բանկի, մյուս մասը` Ասիական բանկի ֆինանսավորմամբ: Եվրոպական բանկի հետ համաձայնագիրն արդեն ստորագրվել է, իսկ Ասիական զարգացման բանկի հետ բանակցությունները շարունակվում են»,-նշել է նա:
«Տրանսպորտի ԾԻԳ» պետական հիմնարկի տնօրենի ներկայացմամբ, մեծ ցանկության դեպքում էլ չես կարող մինչեւ ապրիլի 15-ը որեւէ ասֆալտապատման աշխատանք կատարել: «Եթե չեղավ համապատասխան եղանակային պայման, բնականաբար, այդտեղ ոչ մի աշխատանք չես կարող անել»:
Ինչ վերաբերում է պնդմանը, թե այդ վարկերը բեռ են դառնում երկրի ու քաղաքացիների վրա, նա պատասխաել է. «Չգիտես ինչու, շատերը, երբ վարկի մասին լսելիս կարծում են, թե այդ վարկը նույնն է, ինչ խանութից` 24-25 տոկոսով ապառիկով ապրանք վերցնելը: Մինչդեռ Համաշխարհային բանկից վերցրած վարկերի տոկոսադրույքը մեկ-մեկուկես տոկոս է կազմում` արտոնյալ ժամկետներով»: