Դստեր կողմից կացնահարված Ատալյա Վարդանյանի վիճակը համեմատաբար կայունացել է: Այս մասին NEWS.am-ի թղթակցին ասաց «Արմենիա» բժշկական կենտրոնի վերակենդանացման բաժանմունքի վարիչ Սուրեն Մակարյանը՝ նշելով, որ 66-ամյա կնոջը Էջմիածնից տեղափոխել են իրենց մոտ:
«Արհեստական շնչառության ապարատից անջատել են, վիճակը դեռ ծանր է, սակայն կայունացել է»,- ասաց Սուրեն Մակարյանը:
Հիշեցնենք, որ ըստ Քննչական կոմիտեի տարածած հաղորդագրության, մայիսի 24-ին ժամը 18:00-ի սահմաններում 47-ամյա կինը Արմավիրի մարզի իրենց տան ննջասենյակում, սպանելու դիտավորությամբ, կացնով հարվածել է մոր` Ատալյա Վարդանյանի գլխին։ Հանցագործությունն ավարտին չի հասցվել, քանի որ Ա.Վարդանյանը դիմադրություն է ցույց տվել եւ դիմել փախուստի:
Դեպքի առթիվ հարուցվել է քրեական գործ Քրեական օրենսգրքի 34-104-րդ հոդվածի 1-ին մասով: Սպանության փորձ կատարելու կասկածանքով 47-ամյա կինը ձերբակալվել է:
Պարզվել է, որ կինը հաշվառված է «Շիզոֆրենիա, պարանոիդ ձեւ» ախտորոշմամբ։ Քննիչը նրա նկատմամբ նշանակել է ստացիոնար դատահոգեբուժական փորձաքննություն, որի կատարումը հանձնարարվել է ՀՀ ԱՆ «Նուբարաշեն» հոգեբուժական հիվանդանոցի ստացիոնար դատահոգեբուժական փորձաքննությունների բաժնի փորձագետներին: