Մարտունիի բժշկական կենտրոնի բժիշկ, զինկոմիսարիատի զորակոչային հանձնաժողովի անդամ Վիկտոր Սահակյանին կրկին մեղադրանք է առաջադրվել այս անգամ ծառայությանը ոչ պիտանի նորակոչիկ Պարգեւ Սողոմոնյանին ոչ պատշաճ զննելու եւ հիվանդությունը չհայտնաբերելու համար:
Դեռեւս 2014թ.-ին բժիշկ Վիկտոր Սահակյանը նորակոչիկ Կարեն Ավետիսյանի ներքին օրգանների սոնոգրաֆիկ հետազոտության ենթարկելու ժամանակ անփույթ վերաբերմունք էր դրսեւորել: Նա ոչ պատշաճ կերպով էր իրականացրել իր պարտականությունները եւ չի հայտնաբերել Կարեն Ավետիսյանի մոտ առկա պարտադիր զինվորական ծառայույան համար ժամանակավորապես ոչ պիտանի ճանաչվելու հիմք հանդիսացող «Լյարդի 8-րդ սեգմենտի կրակալված էկինոկոկկային կիստա» հիվանդությունը եւ Կարենը զորակոչվել էր բանակ: Այդ ժամանակ Վիկտոր Սահակյանը տուգանվել էր 300 հազար դրամով:
Պարզվում է՝ եւս մեկ նորակոչիկի՝ Պարգեւ Սողոմանյանին, Վիկտոր Սահակյանը 2015թ. մարտին կատարել է պաշտոնեական անփութություն, այն է՝ զորակոչի ընթացքում Գեղարքունիքի Ծովասար գյուղի բնակիչ Պարգեւ Սողոմոնյանի սրտի հետազոտություն կատարելիս, պատշաճ կերպով չի կատարել իր պարտականությունները: Երկու օրվա մեջ էլեկտրասրտագրության երկու տարբեր արդյունքներ ստանալով՝ Պարգեւ Սողոմոնյանին բժիշկը չի ուղարկել նեղ մասնագիտական հետազոտման, ինչի հետեւանքով չի հայտնաբերել նորակոչիկի մոտ առկա սրտի հիվանդությունը, այլ տվել է սահմանափակումով զինծառայությանը պիտանի լինելու վերաբերյալ իրավաբանական փաստի ուժ ունեցող եզրակացություն: Այսպիսով, Պարգեւ Սողոմոնյանը հուլիսին զորակոչվել է բանակ: Արդեն օգոստոսին ՊՆ կենտրոնական ռազմաբժշկական հանձնաժողովի ուղեգրով կատարված Հոլտեր-մոնիթորինգի արդյունքների համաձայն՝ Պ.Սողոմոնյանի մոտ հայտնաբերվել է «Սրտի ռիթմի խանգարում, հաճախակի փորոքային էքստրասիստոլիա /մինչեւ 11000 օրեկան/ ալլոռիթմիայի /բիգեմինիայի, տրիգեմինիայի/ էպիզոդներով: Եզակի սուպրավենտրիկուլյար էքստրասիստոլիա» հիվանդությունը եւ զինծառայողն ազատվել է ծառայությունից:
Վիկտոր Սահակյանին մեղադրանք է առաջադրվել Քրեական օրենսգրքի 315-րդ հոդվածի 1-ին մասով: Խափանման միջոց է ընտրվել ստորագրություն չհեռանալու մասին:
Գործը քննվում է Գեղարքունիքի մարզի ընդհանուր իրավասության դատարանում: