Օրական Թուրքիայից Սիրիա է մեկնում «Ջեբհաթ ան Նուսրա» ահաբեկչական խմբավորման համար զենք ու զինամթերք տանող բեռնատարների մի ամբողջ շարասյուն, ինչի շնորհիվ այդ խմբավորումը շարունակում է իր գնդակոծություններն ու սադրանքները: Այս մասին հայտնել է ՌԴ ԶՈՒ Գլխավոր շտաբի Գլխավոր օպերատիվ վարչության պետ Սերգեյ Ռուդսկոյը, հայտնում է «ՌԻԱ Նովոստին»
«Թուրքիայից զենքով ու զինամթերքով բեռնված մեքենաների հոսքը չի դադարում, դրանք ամեն օր հատում են թուրք-սիրիական սահմանը: Կենդանի ուժով ու սպառազինումով այս մշտական սնուցումը թույլ է տվել «Ջեբհաթ ան Նուսրայի» ահաբեկիչներին շարունակել սադրիչ գնդակոծությունները ու հարձակում սկսել սիրիական կառավարական զորքերի դեմ, դրանով իսկ կաշկանդելով ԻՊ ահաբեկիչների դեմ նրանց գործողությունները մյուս ուղղություններով»,- ասել է նա ճեպազրույցի ընթացքում: