«Վերջին զանգ» միջոցառման շրջանակներում, այսօր՝ մայիսի 27-ին, ժամը 16-ի դրությամբ, Երեւանի Ճանապարհային ոստիկանության պահպանվող հատուկ տարածք է տեղափոխվել 27 ավտոմեքենա: Այս մասին NEWS.am-ի թղթակցի հետ զրույցում նշեց ՃՈ պահպանվող հատուկ տարածքի պատասխանատու, ոստիկանության մայոր Մայիս Դավթյանը՝ հավելելով, որ նրանցից 2-ը եղել են անչափահասներ, իսկ մնացած 25-ը ուղեւորների փոխադրման կանոնների խախտման դեպքեր են եղել եւ վարորդական իրավունքի վկայական չունեցողներ:
Նրա խոսքով, այս պահի դրությամբ ալկոհոլի օգտագործման դեպք չի հայտնաբերվել:
Նախորդ տարի «Վերջին զանգի» օրը ՃՈ պահպանվող հատուկ տարածք է տեղափոխվել 30 ավտոմեքենա ամբողջ օրվա ընթացքում, իսկ այս պահի դրությամբ այդ թիվը 27 է:
«Նախորդ տարի ընդհանուր հանրապետությունում հատուկ տարածք է տեղափոխվել մոտ 150 ավտոմեքենա»,-ասաց Դավթյանը՝ հավելելով, որ վթարային դեպքեր այս պահի դրությամբ չեն եղել: «Եվս մեկ անգամ հորդորում ենք մեծահասակներին, որ ղեկը չհանձնեն երեխաներին ու անչափահասներին»,-ընդգծեց նա:
Հարցին, թե արդյոք դերասան Հովհաննես Ազոյանի մեքենան եւս հատուկ տարածք է տեղափոխվել, նա պատասխանեց. «Դե նրադ դեպքը «Վերջին զանգի» շրջանակներում չի եղել: Երեկ երեկոյան, այո, ոգելից խմիչք օգտագործած վիճակում տեղափոխվել է: Նրա մեքենան սթափ վարորդը մոտեցել ու տեղափոխել է ավտոտնակ: Վարչական արձանագրությունը կազմվել է»: