Բրազիլիայի ոստիկանությունը Ռիո դե Ժանեյրոյում փնտրում է ավելի քան 30 տղամարդու, որոնք կասկածվում են 16-ամյա աղջկա բռնաբարության մեջ: Բռնաբարողները հարձակման տեսանյութը տեղադրել են սոցիալական ցանցերում:
Այս միջադեպը Բրազիլիայում բողոքների փոթորիկ է առաջացրել: Բողոքողները կոչ են արել վերջ դնել, իրենց արտահայտությամբ, «բռնաբարության մշակույթին» բրազիլական հասարակությունում, հայտնում է BBC-ի ռուսական ծառայությունը:
Միջադեպի մասին ճշգրիտ տեղեկություններ չկան: Որքան հայտնի է, շաբաթ օրը աղջիկը հյուր է գնացել իր ընկերոջը Ռիո դե Ժանեյրոյի արեւմտյան մասի աղքատ թաղամասում: Ոստիկանություն նրա ներկայացրած դիմումի համաձայն, նա կիրակի արթնացել է լրիվ մերկ: Նրա մարմնին վնասվածքներ են եղել եւ նրան տղամարդիկ են շրջապատել: Դրանից հետո նա տուն է գնացել:
Միայն մի քանի օր անց նա իմացել է, որ իր բռնաբարության մեջ կասկածվող տղամարդիկ հարձակման տեսագրությունը տեղադրել են «Թվիթերում»:
40 վայրկյանանոց տեսագրությունն արագ տարածվել է համացանցում, ուղեկցվելով կնատյաց մեկնաբանությունների ալիքով: Շուտով այդ մարդկանց հաշիվները փակվել են:
Ոստիկանությունը կասկածյալների, այդ թվում` աղջկա ընկերոջ ձերբակալության հրաման է տվել: