Կոտայքի մարզում նախօրեին ավազակային հարձակում է տեղի ունեցել:
Ինչպես հայտնում են Քննչական կոմիտեից, մայիսի 26-ին ժամը 22:05-ին ահազանգ է ստացվել, որ Առինջ գյուղի տներից մեկում ավազակային հարձակում է տեղի ունեցել: Նույն օրը ժամը 23:30-ին «Սուրբ Գրիգոր Լուսավորիչ ԲԿ» ՓԲԸ-ից հաղորդում է ստացվել, որ «որովայնի առաջային պատի կտրած-ծակած վերք» ախտորոշմամբ իրենց մոտ բուժօգնության է դիմել Գ.Փահլեւանյանը, իսկ ժամը 23:40-ին «Աբովյան ԲԿ» ՓԲԸ-ից հաղորդում է ստացվել, որ «գլխուղեղի փակ տրավմա, գլխուղեղի ցնցում հարցականով, գլխի գագաթային շրջանի սալջարդ վերքեր» ախտորոշմամբ իրենց է դիմել Վ.Ղազարյանը:
Ձեռնարկված քննչական գործողությունների արդյունքում պարզվել է, որ այդ օրը ժամը 22:00-ի սահմաններում, ավազակային հարձակում է տեղի ունեցել Գ. Փահլեւանյանի տանը: Ավազակային հարձակման ժամանակ բռնություն է գործադրվել տան սեփականատիրոջ նկատմամբ, օգնության է հասել վերջինիս որդին՝ մուրճով հարվածելով ապօրինի տուն ներխուժած անձին։ Պարզվել է վերջինիս ինքնությունը, որը «գլխուղեղի փակ տրավմա, գլխուղեղի ցնցում հարցականով, գլխի գագաթային շրջանի սալջարդ վերքեր» ախտորոշմամբ դիմել էր «Աբովյան ԲԿ»։
Մասնավորապես՝ նախնական տվյալներով՝ Վ. Ղազարյանը դիմակավորված մուտք է գործել Առինջի տներից մեկի բակ, որպես զենք օգտագործվող խաղալիք ատրճանակի գործադրման սպառնալիքով հարձակվել տանտիրոջ՝ Գ. Փահլեւանյանի վրա, իր մոտ գտնվող պլաստմասե տարայում եղած բենզինը լցրել է նրա վրա ու պահանջել գումար։ Հանցագործությունն ավարտին չի հասցվել, քանի որ օգնության է հասել Գ.Փահլեւանյանի որդին եւ մուրճով հարվածել տուն ներխուժած անձի գլխին: Վերջիններիս միջեւ քաշքշուկ է սկսվել, որի ընթացքում Վ.Ղազարյանն իր մոտ գտնվող դանակով հարվածել է Գ.Փահլեւանյանի որովայնին՝ պատճառելով մարմնական վնասվածք:
Դեպքի առթիվ հարուցվել է քրեական գործ Քրեական օրենսգրքի 175-րդ հոդվածի 2-րդ մասի 4-րդ կետի հատկանիշներով:
Քրեական գործի շրջանակներում կատարվել է դեպքի վայրի զննություն, որի ընթացքում տան բակում հայտնաբերվել եւ առգրավվել են խաղալիք ատրճանակի պլաստմասե կտորներ, պլաստմասե շիշ, որի մեջ առկա է եղել բաց դեղնավուն դյուրավառ հեղուկի նմանվող զանգված, դանակ, մեկ զույգ սեւ գույնի բրդյա ձեռնոց, արնանման հեղուկի հետքեր, սեւ գույնի կտորից դիմակ, երկաթյա մուրճ, իսկ այգում հայտնաբերվել է պայուսակ, որի մեջ եղել են կենցաղային իրեր:
Քրեական գործով ձեռնարկված քննչական գործողությունների արդյունքում Վ.Ղազարյանը ձերբակալվել է:
Քրեական գործի շրջանակներում հարցաքննվել են մի շարք անձինք, նշանակվել դատագենետիկական, դատաձեռագրաբանական, դատահետքաբանական, դատանյութագիտական եւ քրեագիտական փորձաքննություններ:
Քրեական գործի նախաքննությունը շարունակվում է:
