Մեքսիկայի մայրաքաղաքի շրջանում օզոնի խտությունը ուրբաթ կտրուկ գերազանցել է առավելագույնս թույլատրելի նիշերը: Այդ կապակցությամբ մեգապոլիսի շրջակա միջավայրի հանձնաժողովը (CAME) այս շաբաթ հերթական անգամ հայտարարել է բնապահպանական տագնապի առաջին փուլը: Մասնագետների տվյալներով, օզոնի մակարդակը ուրբաթ տեղի ժամանակով 15:00-ին հասել է 165 կետի, ինչը 15 կետով ավելի է թույլատրելիից, հայտնում է ՏԱՍՍ-ը:
«Մթնոլորտի կայուն վիճակը եւ թույլ քամին բարձր ճնշման ոլորտի հետ հանգեցրել են նրան, որ աղտոտումը դանդաղ է ցրվում», - նշել են CAME-ից: Բնապահպանական տագնապի ժամկետի ընթացքում Մեխիկոյում եւ քաղաքամերձ շրջաններում կրկնակի սահմանափակումներ են մտցվում ավտոմոբիլային տրանսպորտի օգտագործման վրա: Բացի այդ, ձեռնարկությունները եւ էլեկտրակայանները պետք է 30-40 տոկոսով նվազեցնեն արտանետումները մթնոլորտ, հակառակ դեպքում կտուգանվեն: Բնակչությանը, հատկապես առավել խոցելի խմբերին խորհուրդ է տրվում նվազագույնի հասցնել դրսում գտնվելը:
Ընթացիկ տարում արեւային ուժեղ ճառագայթման եւ Մեխիկոյի շրջանում բարձր ճնշման ոլորտի առկայության հետեւանքով անբարենպաստ բնապահպանական իրավիճակ է դիտարկվել եւ բազմիցս գրանցվել է օդի խիստ աղտոտվածություն: Քաղաքային ագլոմերացիայում, որտեղ ավելի քան 20 մլն մարդ է ապրում, ազոտի բարձր խտության հետեւանքով մարտին հայտարարվել է 14 տարվա ընթացքում առաջին բնապահպանական տագնապը:
Մեխիկոյի իշխանությունները փորձագետների խմբի հետ ներկայումս միջոցների լայնածավալ համալիր են մշակում` մեգապոլիսում բնապահպանական իրավիճակի բարելավման նպատակով: Տեղի մասնագետների գնահատականով, մայրաքաղաքի շրջանում անբարենպաստ բնապահպանական միջավայրն ամեն տարի մոտավորապես 22 հազար մարդու վաղաժամ մահվան պատճառ է դառնում:
