Ֆրանսիայում առնվազն 7 հազար ուղեւոր ստիպված է եղել գիշերն անցկացնել TGV արագընթաց գնացքների վագոններում, որոնք կանգ էին առել Փարիզ-Բորդո գծի վրա խոշոր սլաքային հանգույցի էլեկտրոնիկայի աշխատանքում խափանման հետեւանքով, հայտնում է ՏԱՍՍ-ը` վկայակոչելով France info-ին:
Անսարքության պատճառով ազդանշանային համակարգն անջատվել է գծի մեծ մասում, որը ֆրանսիական մայրաքաղաքը միացնում է Բորդոյին: «Տեխնիկայի նման խափանում առաջին անգամ էր տեղի ունենում ֆրանսիական երկաթուղու պատմության մեջ», - Ֆրանսիական երկաթուղային ընկերության (SNCF) աշխատակցին է մեջբերում BFM-TV հեռուստաալիքը: Դրա հետեւանքով Փարիզ-Բորդո գծի հերթապահը ստիպված է եղել երկաթուղային սլաքային տեղափոխությունների կառավարումն իր վերահսկողության տակ առնել: Դա երկու ուղղությամբ էլ գնացքների ուշացման պատճառ է դարձել:
Գնացքները Փարիզ են հասել միայն հաջորդ օրվա առավոտյան: Ուղեւորներին փոխհատուցել են տոմսերի արժեքի մի մասը:
Մասնագետները հայտնել են, որ գծի ազդանշանային համակարգում անսարքությունը լուրջ է եւ բավականին ժամանակ անհրաժեշտ կլինի դրա վերացման համար: Արագնթաց գնացքների մեկնումն արդեն չեղյալ է համարվել: Խախտվել է նաեւ էլեկտրագնացքների շարժումը: