Հյուսիսային Կորեան պատրաստվում է թողարկել Starcon սոցիալական ցանցը, որի դիզայնը նման է Facebook-ի ձեւավորմանը, հայտնում է Lenta-ն` վկայակոչելով CNN Money-ին:
Ուրբաթ` մայիսի 27-ին կայքը հայտնաբերել է համացանցային վերլուծության Dyn Research կենտրոնի տնօրեն Դագ Մեյդորին: Twitter-ի իր միկրոբլոգում նա ռեսուրսին հղում է տեղադրել:
Մեյդորին նշում է, որ Starcon-ը Facebook-ին նման է ոչ միայն գունային ընտրությամբ, այլեւ որոնման տողի ձեւավորմամբ, ինչպես նաեւ նորությունների ժապավենի ձեւավորման սկզբունքով: Ըստ երեւույթին Statcon-ի ստեղծման համար օգտագործել են phpDolphin հարթակը, որը թույլ է տալիս կայք ստեղծել Facebook-ի կաղապարով:
Սոցցանցն աշխատում է թեստային ռեժիմում: Փորձագետն առայժմ վստահ չէ, թե Հյուսիսային Կորեայի պաշտոնական իշխանությունները կապ ունեն այդ նախագծի հետ: Ընկերության տնօրենը տարօրինակ է համարում, որ սոցցանցին մուտք կարող են ստանալ այլ երկրների օգտատերեր: