Ադրբեջանի նախագահ Իլհամ Ալիեւը ադրբեջանցիներին պատմել է, թե իրենք ինչ լավ եւ երջանիկ են ապրում իր իմաստուն ղեկավարությամբ:
Oxu.Az-ը տեղեկացնում է, որ այդ մասին հայտնել է Ադրբեջանի նախագահ Իլհամ Ալիեւը` ելույթ ունենալով Ադրբեջանի ազգային տոնի` Հանրապետության օրվա առիթով կազմակերպված պաշտոնական ընդունելությանը: Ալիեւ-կրտսերը հայտնել է, որ երկրում հաջողությամբ գործում են բոլոր ժողովրդավարական ինստիտուտները, ապահովվում են ազատությունները` խոսքի ազատությունը, մամուլի ազատությունը, հավաքների ազատությունը, քաղաքական գործունեության ազատությունը, ոչ մի սահմանափակում չկա եւ չի լինի:
Համեմատելով Ադրբեջանում եւ ժողովրդավարական երկրներում հանրության վրա ճնշման դրսեւորումները` Ալիեւը այն եզրակացության է հանգել, որ ադրբեջանական իշխանությունների հասցեին մեղադրանքներն անհիմն են: «Կրկնակի ստանդարտների այս քաղաքականությանը պետք է վերջ դրվի: Դա արդեն անտանելի է դարձել», - բողոքել է Իլհամ Ալիեւը:
«Իսկ թիրախն իհարկե Ադրբեջանի քաղաքական իշխանությունն է եւ ես: Որովհետեւ ես եմ ղեկավարում այդ երկիրը եւ որոշում Ադրբեջանի քաղաքականությունը: Եվ Ադրբեջանի անկախության երաշխավոր ենք հանդիսանում ես եւ ադրբեջանցի ժողովուրդը», — ասել է Ադրբեջանի նախագահը:
Հիշեցնենք, որ Ալիեւի` «երկակի ստանդարտների» ակնարկները կապված են Ադրբեջանի իշխանությունների կողմից ընդդիմադիր գործիչների վրա ճնշման հետ կապված Արեւմուտքի արձագանքի հետ: Հենց այդ հակազդեցության հետեւանքով Ադրբեջանի իշխանությունները ստիպված են եղել ազատ արձակել քաղբանտարկյաներին:
